Shillong, Nailur 01
U Myntri ba khmih ïa ka tnat Labour ka Jylla u Bah Shakliar Warjri ula pyntip ba ka la don ka jingai ‘Labour Licence’ thok ïa ki nongtrei bylla bar jylla ha Meghalaya, kaba wanrah ïa ka jingsngewkhia kaba jur halor ki jingbym biang ha ka jingpyrkhing ïa ki nongbylla.
U Myntri ula pyntip ba ïa kane ka kam shukor la lap ha ka jingbishar ïa ki kam ki jam jong ka tnat, ha kaba la shem ba ki kot ki sla bala lum na ki katto katne ki nongtrei ki dei kiba khlem ai satia da ka tnat Labour ka Jylla.
Haba kren sha ki lad pathai khubor ha ka sngi Nyngkong, u Myntri u la ong, “Kane ka kam ka dei kaba leh da mano re mano ïa kaba ngam tip satia bad kila leh ïa kaei kaei kaba bakla palat. Kumta nga la rai bad ngi kum ka tnat ngin sa ujor da ka ejahar bad ki briew kiba donkti kin ïoh ïa ka jingpynsajia.”
Ula ong ba kane ka jingshem ka dei kaba bakla palat bad kren shai ba ki briew ba donkti kin ngat katkum ki kyndon aiñ. Ula ban jur ruh ba ka Jylla kam lah ban shu sngap ïa kane da kaba ailad ïa kum kine ki kam thok kam shukor.
Hapdeng ki kaiphod ba ki sengbhalang kila nang pynkhlaiñ ban khynra ïa ki laisen nongbylla (Labour Licence), u Myntri ula ong, ka tnat kala sdang ïa ka jingkhynra ha kylleng ki district. Ula pynbna ba ki jingtalasi ïa ki kot ki sla kan long noh ka kam ba leh man la ka por, bad kaba un shong bishar manla ka lai bnai.
“Ngin ym ailad satia ïa kum kine ki kam namar ngin ym ïapeiñ ïa ka jingshngaiñ jong ka Jylla jong ngi,” ula pynthikna. Kane ka jingsei madan kala jia ruh ha ka por ba ka jingkhynra mynder kala jur bha ha Jylla khamtam da ki sengbhalang kiba la pynlong ïa ka jingkhynra manla ka sngi namar ka jingkyndang jong ka Sorkar Assam ïa ki poi ei na ri Bangladesh.
