Shillong, Nailur 01
Ka jingïakynad ktien kaba jur hapdeng ka BJP bad ka Congress ka la khie ha Nongbah Shillong hadien ba ka BJP ka la pynlong ïa ka jingïakhih hakhmat ka Congress Bhavan.
Kane ka jingïakhih ka la mih na ka jingkren pynjah burom kaba la kynnoh ba la kren da uwei u dkhot ka Congress na Jylla Bihar pyrshah ïa ka kmie jong u Narendra Modi, u Myntri Rangbah duh ka ri, kaba la khlad noh.
Hynrei ka Congress pat ka la kyntait ïa kane ka jingkam jong ka BJP, da kaba kynnoh ba kane ka jingïakhih ka dei ka buit saiñ pyrthei ban pynklet ïa ki paidbah ïa ka mat tuh vote ka BJP.
U President ka BJP Yuva Morcha, u Mewaker Lyngdoh, u la pynksan ïa katei ka jingïakhih hakhmat ka ophis Meghalaya Cong-ress da kaba ong ba ka dei ban pyrshah ïa ka jingkren beiñ ïa ka kmie jong u Myntri Rangbahduh, da u nongtrei jong ka seng Congress, u Mohammed Rizvi, uba la shah kem ha ki pulit.
U Mewaker Lyngdoh u la ai khublei ruh ïa ki pulit kiba la shimkhia ban kem noh ïa u Rizvi.
Ula pynbna ruh ba ka BJP kan nym pynlong tang ïa ka jingïakhih hakhmat ophis ka Congress hynrei ka thmu ruh ban pynlong da ka jingïakhih hakhmat ka ophis jong ka Trinamool Congress (TMC), namar ba ki ngeit ba haduh mynta ym pat leh eiei pyrshah ïa ka MP ka TMC, ka Mahua Moitra halor ka jingkynnoh ba ka la kren pynjah burom ïa u Amit Shah.
Ka BJP Meghalaya ka la ujor da ka zero FIR hakhmat u SP jong ka East Khasi Hills ban dawa ban leh eiei pyrshah ïa ka Moitra.
U la pynpaw ba kum ki nongmihkhmat ym lah ban kren khlem jingkitkhlieh kiba wanrah ïa ka jingïapher hapdeng ki briew.
Katkum ka jingong jong u, ka BJP ka ïeng na ka bynta ka roi ka par, ka jingsuk, bad ka jingïatylli hapoh ka ri baroh kawei.
Haba pynrem ïa ka jingïakhih ka BJP Meghalaya hakhmat ka ophis Congress, u Secretary ka MPCC u Bah Manuel Badwar u la batai ba kane ka jingïakhih kadei tang ka buit pynklet ïa ki paidbah na ki mat buittuh ba ka BJP hi ka donkti.
“Ka dei ka jingleh buittuh na ka liang jong ki kaba nga ngeit ba ki kwah burom bad pynklet ïa ki paidbah na ka mat tuh vote da ka party namar mynta ka kynti baroh kawei ka ri ka kren shaphang ka jingtuh vote” la ong u Bah Manuel.
U Bah Manuel u la pynpaw ruh ba ka la don ka jingleh tuh ha ki 70 tylli ki Seat bad ka BJP ka pyrshang ban knieh jubor noh ïa ka rukom synshar paidbah.
U la ban jur ba ki jingeh ba shisha kiba ka ri ka ïakynduh ki long ka jingkyrduh kam bad ka jingbym ïa ryngkat ka jingsam ïa ka spah bad kane ka jingïakhih kadei tang ka buit jong ka BJP ban pynklet ïa ki paidbah.
U Bah Manuel u la kynnoh ba ka BJP, ka don bynta ha ka saiñ pyrthei da kaba pynshong nongrim ha ka ñiam, ka jaitbynriew, bad ka longïing longsem, bad ka kwah tang ban pynthoh bria ïa ka longïing longsem jong u Gandhi, kaba la kit ïa ka jingeh jong ka jingshah kynthoh la slem bah.
Haba ïadei bad ka jingïalang jong ka BJP kaba la long dang shen ha Shillong, u Bah Manuel u la kynnoh ba ka jingïakhih jong ka BJP ka dei kaba la kynshoit da ki nongïalam bad ka dei ka jingpyrshang ban pynsngewbha ïa ki heh jong ka party jong ki ym ka jingsngewkhia kaba shisha.
U la ban biang ba ka Congress kan ïai bteng ban ïeng na ka bynta kiba duk tam na kiba duk bad kan nym shah pynngop ha ki buit jong ka BJP.
U Bah Manuel u la pynpaw ka jingkyrmen ba ki paidbah kin tip ïa ki jingleh jong ka BJP bad kin kyntait ïa ka politik pynpra jong ki.
“Ka jingkhih ha ka ri baroh kawei ka nang ïaid sha kata. Nga ngeit ba 140 klur ngut ki briew ki la sdang ban sngewthuh mynta ba ka BJP kam shym la leh ei ei bad ka BJP ka la thaw ïa ka spah tang na ka bynta ki katto katne ngut ki briew bad ka ri ka la nang duk katba lah ha ka ïoh ka kot” la ong u Bah Badwar, da kaba bynrap “Ka Meghalaya ka dei kawei na kita ki jylla kaba pyrshah. Ngi la pynrem jur bad ngim kwah ba kata kan jia biang”.
