Kabul, Nailar:
Katkum ki khubor, la ong ba da ki spah ngut ki la ïap bad mynsaw ha ka jingkhynñiuh u jumai uba la poi haduh 6 Magnitude ka jingkhlaiñ, uba la lynshop ïa ka thaiñ Kunar kaba don ha ka thaiñ Shatei Lam Mihngi jong ka Afghanistan.
Ki khubor ba nyngkong ki pyni ba ki don 30 ngut kiba la khlad na kawei ka shnong, la ong ka tnat ka koit ka khiah, hynrei ka la bynrap ba ym pat lah ban lum ïa ki jingkheiñ kiba thikna jong kiba mynsaw ha ka jaka jong ki shnong kiba la saphriang kylleng kylleng bad kiba la don ka histori kaba jrong jong ka jingkhynñiuh jumai bad ka jingshlei um.
“Ka jingdon jong kiba ïap bad kiba mynsaw ka la bun bha, hynrei namar ba katei ka jaka ka long kaba eh ban poi, ki kynhun jong ngi ki dang don ha katei ka jaka”, la ong u nongaiktien ka tnat ka koit- ka khiah, u Sharafat Zaman haba ïakren bad ki nongthoh khubor ha katei ka sngi.
Da ki spah ngut kiba mynsaw la rah sha hospital, la ong u Najibullah Hanif, u heh jong ka tnat ai jingtip jong ka jylla, ha kaba ki jingkheiñ ki lah ban nang kiew katba ki khubor ki wan na ki jaka ba jngai kiba duna ki surok.
Ki nongpyllait im ki dang trei ha ki katto- katne ki distrik jong ka jylla lum ha kaba ka jingkhie jumai shiteng miet ka la lynshop ha ka jingjylliew kaba 10 km (6 mile), ban pynïahap ïa ki ïing ki sem bad ki maw ha khappud bad ka thaiñ Khyber Pakhtunkhwa jong ka Pakistan, ong ki heh sorkar.
Ka Afghanistan ka la ju mad ïa ki jingkhynñiuh jumai kiba lah ban pynïap briew, khamtam ha ki lum Hindu Kush, ha kaba ki Lum ka ri India bad bad ki Lum Eurasia ki ïakynduh lang.
Ka jingkhynñiuh jumai kaba la jia ha ka thaiñ Sepngi jong kane ka ri, ka la shim ïa ka jingim jong palat 1,000 ngut ki briew ha u snem ba la dep, kaba pynpaw ïa ka jinglong rit paid jong kawei na ki ri kaba duk tam ha ka pyrthei ha ki jingshah pynjulor ha ka mariang.
