Shillong, Nailur 01
Ka Nongthymmai Sports & Cultural Club kum shi bynta ban rakhe ïa ka National Sports Day 2025 na ka bynta ban kynmaw burom ïa u khlur ïalehkai hockey ka ri India u Dhyan Chand bad kumjuh ruh ban ïatreilang ban wanrah ka jingkoit jingkhiah hapoh ka imlang sahlang, ka la pynlong ïa ka Fit Nongthymmai Movement 2025 kaba la shim na ka kyrteng Fit India Movement kaba la sdang ha u snem 2019 da ka Sorkar India.
Te kumta ka klob ka la pynlong shwa da ka jingïakop mareh marathon ha kaba la wan ban kaweh ïa ka lama da u Bah Winston Tony Lyngdoh, MDC jong ka thaiñ kum u kongsan ha ka step jong ka sngi Saitjaiñ bad la pynbud sa ka prokram lyngkot. Shwa ban sdang katei ka marathon la ïoh ïa ka jingpynbam smai ïa ka ‘Fit India Pledge’. U kongsan haba ai jingkren ula ai ïa ka jingïaroh ïa ka klob kaba pynlong ïa kane ka marathon kaba long kaba kongsan bha ha ka jingim ban long kiba koit kiba khiah. U la pynpaw ruh ka jingsngewkmen ban ïohi ïa ki hep barit bad kumjuh ruh ïa i longkmie iba la ïaw bha ka rta ban ïashim bynta ha kane ka marathon bad u la pynshlur ruh ïa ki nongïashim bynta ba kin nang shim bynta shuh ha ki prokram jong ka klob ha ki sngi ban wan ruh.
Hadien ka Marathon, la ïoh ban batai haba ïadei bad ki jingbha ha ka jingkilanmet kaba la ïoh ïa ka jingpynshai na u Bah Kyrshan Marbaniang, PTI. La pynbud pat sa ka jingkren ai nuksa bad pynshlur ïa ki nongshim bynta ha ka marathon da ka Darisha Ïangjuh, kaba long ka nongmareh kaba lah mihkhmat ïa ka Jylla ha kylleng jong ka ri India.
Ha kane ka sngi, la ïadon ryngkat ruh u Bah S.B Kharshandi, Rangbah Shnong, Dorbar Shnong Lawjynriew uba la ai jingkren ïa ki kyntien ai mynsiem ïa ki nongïashim bynta ba kin pynmlien ha ki jingïalehkai ban lait na ki jingpang jingshitom ban long kiba shait kiba khlaiñ.
Ha kane ka Fit Nongthymmai Movement la ïoh ïa ka jingïashim bynta na ki khynnah skul, ki khynnah rit, samla shnong kynthei bad shynrang bad kumjuh ruh ki rangbah/longkmie jong ka Shnong Nongthymmai kiba hap hapoh ka jylli treikam jong ka klob. Te kumta ka klob ka la pynpaw ka jingsngewnguh ruh ïa baroh kiba la don bynta ban pynbit pynbiang na ka bynta katei ka prokram kaba jop.
