Mawkyrwat, Nailur 01
Ka Khasi Student’s Union (KSU) Langkynma Area Unit ha ka 1 tarik u Nailur, 2025 hapoh ka jingïalam u samla Rocke -feller Dkhar, General Secretary ryngkat bad ki dkhot ki la leit ban kyndang naphang ïa ki bar jylla kiba trei hapoh ki coke factory kiba don ha ka thaiñ Nongjri ha South West Khasi Hills District.
Ka jingleit khynra ka seng ïa kine ki coke factory ka long ban pynthikna ba don ne em ki nong Bangladesh kiba wan ban rieh tngen bad wan trei ha kine ki karkhana kaba lah ban wanrah jingma ïa ka dong ka thaiñ kumba la jia ha kine ki khyndiat bnai ba ladep ha kaba ka ladon ka jingthombor jong ka kynhun pyntriem na Bangladesh ïa ki shnong khappud jong ka South West Khasi Hills District.
U samla Rockefeller Dkhar haba kren sha ki lad pathai khubor u la ong, ka jingthmu jong ka seng ban khynra ïa kine ki ‘coke factory’ ka long kum shibynta ban khanglad ïa ka jingïoh wan rung kyrthep ki bar jylla sha kine ki thaiñ bad ban peitngor ruh ba ïoh don ki nong Bangladesh kiba wan rieh tngen ha kine ki karkhana.
Ha kane ka jingleit khynra, ka seng kam shym la lap ïa ki nong Bangladesh hynrei ka lap ïa kiba bun ngut ki bar jylla kiba wan ïalam ryngkat ïa ka lok bad ki khun ki kti ha kine ki jaka trei kiba dei na ka jylla Assam bad kiwei kiwei ki jylla bad ki bym biang ïa ki kot ki sla bad ka seng ka la beh krad bad pynphai noh ïa kine ki bar jylla sha ki jaka kaba ki wan.
Ha kawei pat ka jingjia,ka KSU Ranikor Circle ha ka miet shiteng synñia jong ka 1 tarik u Nailur 2025 haka por kumba 1 baje eiei kala ïoh bat ïa kawei ka kali Bolero ronglieh kaba don ïa u registration number ML12-3998 kaba kit ïa ki 8 ngut ki bar jylla ki bym don ïa ki kot don ki sla, kynthup ïa ki 2 ngut ki khynnah ki bym pat ïoh wat tang ka EPIC bad kiba thmu ban leit bylla sha ki thaiñ Nongjri ha SWKHD.
Ïa kine ki bar jylla la ïoh bat da u samla Bantip Syiemlieh, Assistant Secretary KSU Ranikor Circle ryngkat ki dkhot bad hadien ka jingtohkit la lap ba kine ki bar jylla kim don ïa ki kot ki sla, kumta ka seng kala aiti noh ïa ki ha ki pulit jong ka Ranikor ba kin leh ïa kaba donkam.
Naka liang jong ka seng kala kyntu ïa kito ki briew kiba ju mlien ban wanrah ïa ki bar jylla lada dei kontraktor ne riew shimet ba kidei ban wanrah ïa kiba don kot don sla, kim dei ban wanrah ïa ki bym don kot don sla kumba ka seng kajuh lap na kapor sha kapor. Ka seng ka la pynpaw ruh ba lyngba ka jingdon kum kine ki briew kiba shim kabu ban myntoi shimet ka pynlong ïa ki bar jylla ba kin ïoh rung katba mon sha kane ka dong ka thaiñ.
