Shillong, Nailur 01
Ka shnong Williamnagar ka la i-shongkun haba ki briew na man la ki dong ki jaka jong ka Thaiñ Shatei Lam Mihngi, ryngkat ki nongwan ïashim bynta na kylleng ka ri, ki la ïalum lang ban kynmaw burom ïa ka lyngkhuh sngikha kaba 78 jong u P.A. Sangma (Bam Kwai ha Dwar U Blei) kumjuh ban rakhe ïa ka sngi seng kaba 13 jong ka National People’s Party (NPP).
Ïa kane ka jingrakhe la pynlong ha Madan ïalehkai Rongrenggre bad la sakhi ïa ka jingwan poi jong bun bah ki briew, kaba pyni ïa ka jingburom bad jingsngew-nguh kaba neh ïa une u nongïalam ba la khlad noh.
Ïa kane ka prokram kaba shisngi, la sdang ha ka por mynstep da ka jingïakop rwai, bud sa ka jingpyllait ïa ka ‘Coffee Table Book’ bad ka jingplie ïa ka ‘P.A. Sangma Photo Gallery’.
Ka jingïalang kaba pura ka la sdang ha ka por 1 baje mynsngi ha ryngkat ka jingrwai ‘Oh Ang Aman Asong’, ka jingrwai ba la thaw da u Beston Momin bad ba la thaw thymmai da ka kynhun tem ba pawnam ka ‘Nokpante’. Ïa kane ka jingrwai la shim kum ka ‘Anthem’ da ka NPP ha Ri-lum Garo.
Ka kurim jong u P.A. Sangma (Bam Kwai ha Dwar U Blei), ka Soradini K. Sangma ka la leh burom da kaba buh ïa ki syntiew, ha kaba la ïasnohkti lang da kiwei pat ki ‘riewpawkhmat ba kynthup ïa u khlieh ka NPP bad Myntri Rangbah ka Jylla, u Conrad K. Sangma.
Ïa ka jingkren pdiang burom la kren da u Myntri ka Sorkar Jylla, u Marcuise N. Marak.
Ha kane ka jingïalang, la pynkup burom ïa palat 300 ngut ki dkhot bathymmai na ki seng saiñ pyrthei bapher-bapher kiba dang shu pynïasoh shen sha ka NPP.
Kum ka jingithuh ïa ki ‘riew don sap ha ki kam ïalehkai, la pynkup burom ïa katto-katne ngut ki nongïalehkai na East Garo Hills da ka khusnam P.A. Sangma Achievers’ Award’. Ban pynpaw shuh-shuh ïa ka jingsngewnguh haba ïadei bad ka jingnoh synñiang bad ka jingkynmaw burom ïa une u nongïalam ba la khlad noh, la pynkup burom kyrpang ruh ïa ka kurim jong u, ka Soradini K. Sangma.
Kiwei-kiwei kiba la shah pynkup burom ki kynthup ïa Sonelal Kol, N.K. Gauri bad Breston Momin. Ki la long ki paralok ba ïajan bha bad u P.A. Sangma bad ki la long ki nongïarap ban pynwandur ha ka ban thaw ïa ka seng.
Haba ai jingkren ha ka jingïalang, u Thangwang Wangham, State President ka NPP-Arunachal Pradesh, u la pynkynmaw ïa ka jingïajan jong u bad u Sangma, ha kaba u la kdew ïa u kum u nongïalam ba shisha jong ka Thaiñ Shatei Lam Mihngi. U la kyntu ïa ka jingïalang ban pynkhlaiñ ïa ka NPP bad ban rah shakhmat ïa ka jingthmu jong ka.
Kumjuh, u MP ka Rajya Sabha, u Dr. W.R. Kharlukhi u la ïathuh ïa ki jingshem jong u haba u la trei ryngkat bad u Sangma bad u la pynpaw ïa ka jingsngewkhia kaba jur jong u (Sangma) na ka bynta ka bha ka miat jong ki briew bad ki bor pahara kiba la ïeng ha syndah jong u.
U Symbud Myntri Rangbah ka Jylla, u Bah Sniawbhalang Dhar, u la pynpaw ïa ka jingsngewsih namarba um shym la ïoh lad ban ïatreilang markhmat bad u Sangma hynrei u la kubur ïa ka jingïohi jngai jong u, ki jingmut jingpyrkhat, bad ka pateng jong u, kiba u la ong ba ki ïai bteng ban saiñdur ïa ka lawei jong ka Meghalaya.
U Lamphang ka Ïingdorbar Thawaiñ ka Jylla, u Thomas A. Sangma, u la ban jur ba ïa ka jinglong nongïalam jong u Sangma, u la batai da ka jingaiti jong u na ka bynta ka bha ka miat jong ki ‘riewlum, ki trai-ri trai-muluk, bad ki jaidbynriew ba shah iehnoh beiñ, da kaba bynrap ba ki jingnoh synñiang jong u ki ïaid jngai shabar jong ka Ri-lum Garo sha ka Thaiñ Shatei Lam Mihngi baroh kawei.
U National Working President ka NPP, u James K. Sangma, u la pynpaw ka jingsngewnguh ïa ki nongïalam na ki bynta bapher-bapher jong ka Thaiñ Shatei Lam Mihngi kiba la wan ban ïashim bynta ha kane ka sngi, ha kaba u la ñiew ïa ka jingwan jong ki kum ka jingburom kaba biang eh ïa une u nongïalam ba la khlad noh.
Na ka liang u National President ka NPP uba long ruh u Myntri Rangbah ka Jylla, u Conrad K. Sangma u la ïasam ïa ki jingkynmaw shimet haba u la synran lang ïa la u kpa ban pynwandur ïa ka seng ha Manipur. U la ïathuh kumno, watla tang arngut ki briew kiba la wan sha ka jingïalang kaba sdang jong ki, ka jingkyrmen skhem jong u kpa jong u ka la pynkylla ïa kata ka khyllipmat sha ka nongrim jong ka jingïakhih kaba nangroi.
Haba batai ïa u P.A. Sangma kum u briew u bym khih ha ki jingeh bad uba dap da kiei-kiei kiba manbha, u Conrad u la pynpaw ba dei lyngba ka jingïalam jong u kpa jong u ba ka NPP ka la kiew haduh ka kyrdan kaba mynta. U la kdew da ka jingsngew sarong ba ki paidbah ka Thaiñ Shatei Lam Mihngi ki la pdiang ïa u P.A. Sangma bad ka seng jong u, da kaba pynlong ïa ka kum ka kam kaba don burom ïa ki paidbah ka Ri-lum Garo.
Haba pynkut ïa ka jingkren jong u, u Conrad u la pyrkhat ïa ka jingmut jong ka kyrteng u kpa jong u, u ‘Purno’, kaba mut “ba pura,” bad u la ong ba u kpa jong u, u la im shisha ïa ka jingim kaba pura bad kaba don jingmut.
Ha kane ka sngi la plie ruh ïa ka ‘P.A. Sangma Museum Arena’ ha Williamnagar.
