Shillong, Nailur 01
Ka Hynñiewtrep National Youth Front (HNYF) East Khasi Hills District ha ka 1 tarik Nailur, 2025, hadien ka jingïoh jingujor ba ka la don ka jingshah beh ki Khasi kiba treikam ha ka kompani Indus Tower kaba don ha Laban bad ba la pynrung kam pat da ki briew kiba dei ki barjylla, kala leit mar-mar sha katei ka kompani ban wad jingtip kham bniah halor kane ka jingjia.
Ha kane ka jingleit jurip ka Seng, ka la lap ba kane ka kompani kam don satia wat tang ïa ka Trading Licence bad ka Trading Licence kaba ki buh ha kane ka ophis ruh ka dei ha ka kyrteng jong ka Bharati Infratel bad kadei kane ka ophis kaba don laisen tangba ka laisen jong ki ruh ka long kaba khlem pat pynthymmai satia. Ka seng kala lap ba ka Bharati Infratel ka la ïoh ïaka Trading Licence ha u snem 2013 haduh 2014 bad ki khlem pynthymmai shuh naduh katei ka por.
Naka liang ka HNYF kala pynpaw ïa ka jingsngew lyngngoh ba kumno kane ka kompani Indus Tower ka pyntreikam da kane ka kot Trading License kaba la ïap naduh mynno.
