Nongstoiñ, Nailur 01
Ki kam tuh kam thiem ki la nangkharoi ha ki bynta jong ka sor Nongstoiñ katba nangmih ki sngi kata ym tang ha ka por miet hynrei wat ha ka por mynsngi mynshai ruh bad kane ka la wanrah shisha ïa ka jingbym shngaiñ shuh ïa kiba bun ki nongleit nongwan khamtam ïa ki kynthei khynnah bad ki tymmen ki kro.
Katkum ka tyllong khubor bala ïoh lum, kane kala jia ruh ha ka sngi Nyngkong jong ka taïew ha ki bynta jong ka ïew Nongstoiñ, ha kaba uwei u Paieid uba la tip kyrteng kum u Slar Hoojon ba la 80 snem ka rta, katba u dang thmu ban leit thied dohmok (ka doh snam ne doh phret) ha ka kyntoid kaba ju die doh mynno mynno, uwei u briew u la kynrup bad patan ïa utei u paieid bad u la knieh lut ïa ka pisa kaba u don kaba la kot haduh 14 spah tyngka.
Shuh shuh katkum ka jingïathuh jong utei u Paieid, la ong ba la antad ba katei ka la jia ha ka por kumba 10:30 mynstep. Ka khubor ka ong ruh ba utei u Paieid udei uba na ka shnong Rngikseh, kawei na ki shnong ha ka thaiñ Parïong ha Eastern West Khasi Hills District bad la ong ba u Paieid u la pyrshang ban ïakhun hynrei namar ka jinglong tymmen um shym la lah pat ban leh eiei bad u la ur ha ka nala bad u la jrem ka met ka phad bad utei u briew mar ïadep knieh ka pisa, u la phet krad na katei ka jaka ha kaba ym shym la don ba lap ne ïohi satia.
Shuh shuh halor katei ka jingjia, kiba bun ki nongshong ïew hapoh ka ïew Nongstoiñ ki la ïathuh ba ha ki katto katne ki bynta jong ka ïew tang mar kem dum ka bneng la hap ban khang noh ki dukan namar ba tieng bad ym sngew shngaiñ shuh.
