Shillong, Nailur 01
Ka Khasi Student Union (KSU) South Khasi Hills Unit ha ka 01 tarik u Nailur 2025, ka la leit ban ïakynduh ïa u Executive Member ka tnad trade jong ka District Council u Bah Winston Tony Lyngdoh halor ka jingsngewphylla jong ka, namar ha ki por kiba mynshwa ha ka jingleit khynra ka seng, ka ju ïoh beit da ki Labour Clearance Certificate jong ka District Council bad jong ka State hynrei mynta pat ka ïoh da ki slip kiba ïapher ha ka rong kiba don la u jong u jong u nong saiñ.
Haba kren sha ki lad pathai khubor u Bah Reebokstar Diengdoh, President u la ong ba ka Khasi Students’ Union (KSU) kan nym kheiñ snep shuh ïa ki Non-Tribal Employee Clearance Certificate jong ka Khasi Hills Autonomous District Council (KHADC) bad kdew ba ha ki jingbteng kyndang nongbylla bar jylla ban wan ka seng kan shah tang ïa kiba don ïa ki Police Verification bad ki No Objection Certificate na ki shnong kiba don jaka trei kiba don bad ha u pud u sam ka thaiñ Sohra.
U la ong ruh ba ka seng ka la buh jingkylli halor kumno ka KHADC kan pynthikna ba ki nongshimwai ban ot slip ïa ki nongbylla barjylla ha ka dor 700 tyngka ba kin ïoh pat ïa ki Non-Tribal Employee Clearance Certificate ban bylla, kin pyndep hok la ka kamram ym ban ïa bam tang ka pisa . Ka seng ka la ai jingmut ruh ïa u EM ba lada lah ïa ka Labour Clearance Certificate kaba long kum ka aiñ jong ka District Council dei ban peit hi noh da ka Council khnang ba ki briew kiba ïoh ban aiwai ïa ki Labour Clearance Certificate kin ym ai pathar.
U la ong ban na ka liang u EM u la pynpaw ba ka District Council kam lah ban peit hi ïa kane ka kam namar ka jingduna briew kumta ka hap ban ai wai sha ki riew shimet.
Ka seng ka la pynpaw ruh ba kam kwah shuh ba ka Council kan dang pyndonkam ïa kitei ki slip hynrei ba kan pyndonkam beit da ka Labour Clearance ba lada kim pat biang ïa ki kot, ka Council kan beh noh beit ïa ki. Hynrei u EM u la ïathuh ba ka Council kam donbor ban beh namar ka Labour Clearance Certificate ka long tang kum ka kot kaba pyni ïa ka jingsiew khajna.
Kumta na ka liang ka seng ka la krenshai ba kan ïaid shakhmat ban khynra ïa ki bar jylla bym biang kot biang sla bad ban ym ñiew shuh ïa ki aiñ jong ka District Council namar kam donbor ban beh ïa ki briew ki bym don ïa ki kot ki sla kiba biang, la ong u Bah Reebokstar.
