Jowai, Nailur 01
Ka Lumphyrnai Sohphoh ka la pynliem noh ïa ka Nongkhrohrim da 2-1 kol na ka bynta ban khur jingjop ha ka Super Division (Kelsiroy Pala Memorial Football Tournament) ba la pynïaid da ka Thadlaskeiñ Sports Association (TSA) ha ka lah sngi U Blei ha Wahïajer Multi Sports Complex.
Ha kane ka jingïakhun ka Nongkhrohrim ka la ïoh ban pynkhih jar nyngkong eh ha ka minit kaba 19 lyngba u Robito Nongspung, hynrei tang hadien shi minit ka Lumphyrnai Sohphoh ka la pynphai kylla lyngba u Sumar Suting na ka bynta ban ïakhaid mar shi kol. Kane ka kynhun ka la thep biang ïa ka kol kaba ar lyngba u Habandajop Khynriam (50) na ka bynta ban pynlong ïa ka Lumphyrnai ban khur syndon ïa ka jingjop.
Haba phai sha ka 2nd Division (Joybell Suiam Memorial Football Tournament) hapdeng ka Iongshiwiat bad ka Mukhla Wahshnong ki la ïakhaid mar 1-1 kol. Ïa ka Iongshiwiat la thep da u Elias Lyngdoh (52), katba na ka Mukhla Wahshnong la thep da u Heibor Sari (70).
Kumjuh ha ka jingïalehkai kaba bud hadpeng ka Ïawpynsin Wahïajer bad ka Namdong A ki la ïakhaid mar 1-1 kol. Ïa ka kol jong ka Ïawpynsin la thep da u Markatjuh Dkhar (10), katba na ka Namdong A la thep da u Kriskot Mukhim (60).
Ha ka sngi Ba-ar, ka jingïalehkai ha ka 2nd Division kan long hapdeng ka Tympang SC pyrshah ïa ka Myngkrem SC ha ka por 10 baje mynstep bad ka Maia SC ïa ka Pdienlum SC ha ka por 12 baje mynsngi, katba ha ka Super Division ka Mukhlaraij SC kan ïakynduh pyrshah ïa ka Nongkhroh Krem Kum haka por 3 baje nohphai sngi.
