Shillong, Nailur 01
Ka Meghalaya Pradesh Congress Committee (MPCC) ka la pynrem jur ïa ka jingïakhih jong ka Bharatiya Janata Party (BJP) shabar jong ka Congress Bhavan ha ka Lah Sngi U Blei ha Shillong.
“Kane ka jingïakhih kam dei kaei-kaei hynrei ka jingkut lad ban kynriah na ka jingeh kaba nang jylliew jong ka Sorkar Modi ha ka liang ka jingshaniah. Da kaba pynshong nongrim halor ka jingkynnoh thok ba u Rahul Gandhi, u nongïalam ka Congress u la kren beiñ ïa ka kmie ba la khlad noh jong u Myntri Rangbahduh ha ka por jong ka ‘Vote Adhikar Yatra’ ha Bihar, ka dei sa kawei pat ka jingpyrshang jong ka BJP ban kynriah ïa ka jingpyrkhat na la ka jong ka rekod jong ka jingpyntlot ïa ki tnad treikam, ka jingpyndonkam bakla haba ïadei bad ka ilekshon, bad ka jingeh ha ka liang ka ïoh ka kot,” ong ka kyrwoh na u Chairman, Social Media Department, MPCC, Bah Lang Kupar War.
Ka MPCC haba ban biang ba kam shym la don kaba kum kata ka jingkren na ka liang u Gandhi, ka la kynnoh ba kane ka dei ka buit barim jong ka BJP-haba la ker-kut da ki jingshisha, ki buhrieh ha lyndet jong ka jingsngew.
“Haba kim lah ban jubab na ka bynta ka jingbym don kam don jam, ka jingkiew dor, bad ki ilekshon ba leh thok, ki pyndonkam atiar ïa ka jingsngewsih, ka niam bad ka jinglong kyrpang ban pynkylla ïa ka sobjek,” u la ong.
Halor ka jingleh thok haba ïadei bad ka ilekshon, ka seng ka la ong ba ka BJP kam pat lah ban jubab halor ki jinglap kiba shyrkhei, kiba la pynskhem da ki sabut, halor ka jingpynkylla ïa ka thup kyrteng ki nongthep ‘vote’, kaba la pynpaw da ka Congress ha ka thaiñ Mahadevapura konstitwensi jong ka Karnataka.
“Lada kum kane ka kyrdan jong ka jingleh thok ka lah ban jia ha Karnataka, ka lah ban jia ha kano-kano ka jaka- kynthup hangne ha Meghalaya,” ong ka kyrwoh.
Na ka liang une u nongïalam u la ong ruh ba kane ka jingleh thok ha kaba ïadei bad ka ilekshon ka dei shi bynta jong ka projek kaba kham heh bad kaba kham shyrkhei: ka jingpynpra ïa ka synshar paidbah ka India hapoh ka jingsynshar jong ka BJP.
“Ki lad pathai khubor ki shah pyrkhing lyngba ka ‘blackmail’ pisa bad ka jingshim ïa ka jinglong trai; ki nongthoh khubor kiba leh pyrshah ki shah pynsngap jar ne shah pynngat ha ki kam runar. Ka pule-puthi ka la shah bat ha ka nongrim pyrkhat-ki kot pule la thoh biang ban pyndam noh ïa ka jingshisha jong ka histori bad ban pynbor ban ngeit ban ïa kaba hikai. Katba ki jaidbynriew rit paid-ki Khristan, ki ‘riewlum, ki Dalit bad ki Muslim-ki mad ïa ka jingshah thombor bad jingshah kyntait kaba nang jur, bunsien ha ryngkat ka jingïada jong ka Jylla khlem da shah pynshitom,” ong ka kyrwoh.
Kumta ka MPCC ka khot ka wer ïa ki nongshong shnong ka Meghalaya bad jong ka ri ban ithuh ïa kaei kaba don shisha ha ka jingma – ka jinglong hok ha ka ilekshon ka dei ka jingshah pynjulor kaba nyngkong eh-haba ki thup kyrteng ki nongthep ‘vote’ ki shah pynsniew, ka synshar paidbah ka kylla long kaei-kaei kaba la thoh bad pyrkhat lypa.
“Ka ‘Article’ 326 jong ka Riti Synshar kaba ai ïa ka hok ban thep ‘vote’, ka kylla long kaba thylli haba ka rukom jied nongmihkhmat ka la shah pynthut. Ka synshar paidbah ha ka Dorbar Thawaiñ ka la shah pynhiar sha ka jinglehkai rynsan, kaba khlem ka jingkitkhlieh kaba shisha,” ong u Bah War.
Shuh shuh u la bynrap, “Ka jingma kaba khraw ka long ba ki pateng ban wan kin ïoh pateng ïa ka ‘Republic’ ha ka kyrteng hynrei ym ha ka jinglong- ha kaba ki shlem treikam kin sah ha ka dur hynrei kim shakri shuh ïa ki paidbah.”
