Shillong, Nailur 01
Hadien kumba katto kattne sngi ba na ka liang ka seng HITO, ha ryngkat ka jingdonlang ki pulit ka District Council, ki la leit ban khynra ïa kawei ka dukan ba dei trai ki bar jylla kaba don ha Qualapatty ha kaba la lap ruh ba katei ka dukan kam shym don ïa ka trading lisen bad ki la phah khang noh shisyndon.Kane ka jingleit khynra ka seng kadei ha ka 26 tarik u Nailar 2025.
Halor kane ka jingjia na ka liang ka Dorbar Shnong Qualapatty ka la phah ïa ka kyrrwoh sha u Nongsaiñ Hima ban pynshai paidbah.
Ka Dorbar Shnong Qualapatty ha ka kyrwoh ba la phah ka la pynshai ba kadaw tynrai jong kane ka jingjia ka sdang na ka jingïohkem ïa ki san ngut ki nongtrei jong u Pramod Prasad (Kiba kynthup ïa u Asamese, Nepali bad Khasi) kiba la tuh ïa ki mar khaïi na ka kali jong u, kaba la pynshisha ïa kane lyngba ka ‘video footage’ kaba la jia ha ka 23 tarik u Nailar 2025. Ha katei hi ka sngi la rah ïa ki sha Lumdiengjri Police Station namar ba kane ka kam ka lah jia da ki bun bnai tad haduh ban da ïohkem ïa ki.
“Ha Police station ki la ïa poi sha ka jingïasuk hapdeng kine ki nongtrei bad ka lok jong u Promod Prasad bad u manager ka dukan hakhmat ki pulit da kaba ki la kular ban siew ïa ka bai mar kaba la kot la kumno kumno sha ka T.7 Lak” La ong ha ka kyrwoh.
La ong ruh ba hapdeng ka jingïakren hapoh thanad, ka la don ruh ka jingïasngewthuh bakla hapdeng jong ki halor ka jingong jong ka lok u Pramod ba ka kam tuh ka long “Low Class” hynrei kine ki nongtrei ki la kynnoh ba kane ka lok u Pramod ka la khot ïa ki, ki “Low class”. Bad dei halor kane ka jingsngewthuh bakla la don ba la pynphriang ïa kane ka khubor sha ki seng bhalang, kiba la wan ban tuklar bad khynra ïa katei ka dukan halor ka mat ba la kynnoh ba ïa ki Khasi la khot ki “Low Class”.
Ha katei ka jingkhynra jong ki Sengbhalang ha ka jingdon ryngkat jong ki pulit bad ki ophisar jong ka District Council la lap ba une u Pramod Prasad um don ïa ka Trading License, hynrei na ka liang jong ka Dorbar Shnong Qualapatty hadien ba ka la dep ban bishar bniah, ka la shem ba u long u ba dei hok (genuine) ban ïoh ïa ka Trading License, ha kaba ka la ai ïa ka NOC naduh u snem 2023, Pynban halor ka mat jong ka jingïoh Trading License jong u, ka Dorbar Shnong kam don jingtip eiei namar ka la aiti ïa ka NOC ha u Pramod, katba ïa ka Trading License ka dei ka kam jong ka District Council bad u trai dukan shimet, la ong ka Shnong ha ka kyrwoh.
Shuh shuh ka la ong ba halor kine ki jingjia baroh, ka Dorbar Shnong Qualapatty ka kwah ban pynshai paidbah ba kam shym la ïoh jingtip eiei ruh em kumba la bynrap ha ki rynsan Social media, ba ka bor pynïaid shnong ka la don lang ha kato ka 25 tarik haba la wan ban khynra ïa katei ka dukan. Kumta na ka liang ka Dorbar Shnong Qualapatty, Shillong ka kyrpad ïa kino kino ki seng ne ki kynhun treikam, ki tnad sorkar, ki bor Pulit bad kiwei kiwei ba haba ki don kino kino ki jingthmu ban wan khynra ne tohkit ïa kino kino ki jingjia hapoh shnong, ba kin da sngewbha ban ïaid lyngba ka Dorbar Shnong, khnang ba kum kine ki jingjia kin nym jia shuh hadien habud kaba lah lehse ban long ka jingpynbudnam ïa ka Shnong.
