Aizawl, Nailur:
U K. Sapdanga uba dei u Myntri ka tnat ki kam pohïing ha ka jylla Mizoram u la pynpaw biang ba ka sorkar jylla ka pyrshah ïa ka jingthmu jong ka sorkar pdeng ban ker kynroh ïa ka bynta jong ka Mizoram ha khappud Indo-Myanmar.
Haba kren ha ka ïingdorbar ka jylla, u Sapdanga u la ong ba katba ka jingker ïa u pud u sam jong ka pyrthei ka hap hapoh ka jingpeit jong ka sorkar pdeng, ka sorkar pdeng ka ïatreilang bad ki shipai Assam Rifles bad bishar bniah ïa kane ka kam.
U la bynrap ba ka sorkar Mizoram, kum ka trai jaka, ka la pynpaw ïa ka jingsngewkhia jong ka hynrei ka kyrshan ruh ïa ki jingthmu ba kham jylliew jong ka sorkar pdeng ha kaba ïadei bad ka jingpynïaid ïa ki khappud.
U myntri u la kdew ïa ka rai jong ka ïingdorbar kaba la mynjur ha ka 28 tarik u Rymphang,2024, kaba pyrshah ïa baroh ar tylli ki jingthmu ban ker kynroh bad ka jingpynduh noh ïa ka Free Movement Regime (FMR) bad ka Myanmar.
Ka Mizoram ka ïasam ïa u pud u sam uba jrong 510 kilomitar bad ka jylla Chin jong ka Myanmar, bad ki jaitbynriew Mizo ki ïasam ïa ka jingïadei kaba khlaiñ bha bad ki Chin. Mynta, palat 29,000 ngut ki phetwir na ka jylla Chin, kiba la shah pynkynriah jaka hadien ka jingkhihwin jong ki shipai ha Myanmar ha u bnai Rymphang, 2021, ki shong rieh tngen ha Mizoram.
