Shillong, Nailur 01
Ka jylla Meghalaya ka la sakhi ïa ka jingkiew kaba 3.7% ha kaba ïadei bad ka jingjia aksiden ki kali bad ïap briew, katkum ka kaiphod 2020-23 jong ki jingjia aksiden ha surok kaba la pynmih da ka tnat Ministry of Road Transport and Highways ha ka sngi Nyngkong.
Ha u snem 2023, haduh 1.73 lak ngut ki briew ki la duh noh ïa la ka jingim na ki jingjia aksiden kali ha India bad haduh 4.63 lak ngut kiba la mynsaw. Ki jingjia aksiden ha ki surok bunsien ki jia na kiba bun ki daw bad la donkam ban don ki lad ki lynti ban pynduna ïa ka jingaksiden bad ka jingïap briew.
Ha ka thaiñ Shatei Lam-mihngi, ka kaiphod kala kdew, ki jylla shatei lam-mihngi ha ka jingkheiñ kyllum ïa ki jingjia aksiden ka la long beit ha kine ki san snem ba la dep, kata u snem 2019 haduh 2023. Napdeng ki Jylla ka thaiñ Shatei Lam-mihngi,ka Assam ka la ïohi ïa ka jingbun tam ki jingjia aksiden ha u snem 2019 haduh 2023.
Ka Tripura, kaba don 577 tylli ki jingjia aksiden, ka don ha ka kyrdan kaba-ar, bud sa ka Manipur, kaba don 398 tylli ki jingjia. Ki jingjia aksiden ki la nang kiew ha u snem 2023 ban ïa u snem 2022 ha Assam, Arunachal Pradesh bad Tripura. “Ha baroh kiwei pat ki jylla jong ka thaiñ shatei lam-mihngi, ka la don ka jinghiar ha ki jingjia aksiden ha u snem 2023 haba ïanujor bad u snem 2022”, ong ka kaiphod.
Ha u snem 2022 ki don haduh 162 ngut ki briew kiba la ïap na ka jingjia aksiden kali ha Meghalaya, kaba la kiew sha ka 168 ngut ha u snem 2023. Ki jingjia aksiden kali ki la hiar na ka 246 sha ka 223 tylli.
Ha baroh kawei ka ri, ki don haduh 4,80,583 tylli ki jingjia aksiden surok kiba la pyntip da ki Jylla bad ki Union Territory (UT) ha u snem 2023, kiba la shim ïa 1,72,890 ngut ki mynsiem briew bad kiba la mynsaw ki long 4,62,825 ngut ki briew. Ka jingjia aksiden ha surok ha u snem 2023 ka la kiew da 4.2% haba ïanujor bad u snem ba la dep, u snem 2022.
Napdeng ki Jylla, ka Tamil Nadu ka dei ka jylla kaba bun eh ki jingjia aksiden kali ha u snem 2023 kata haduh 67,213 tylli ki jingjia aksiden (kaba kiew 14 %), bud sa ka jylla Madhya Pradesh (55,327, kata ban kiew da 11.5%). Katba ka Uttar Pradesh (23,652, kata 13.7%) ka long kaba hakhlieh duh jong ki Jylla ha kaba ïadei bad ka jingdon jong ki briew kiba ïap namar ki jingjia aksiden ha surok, bud sa ka Tamil Nadu (18,347, kata da 10.6%).
