Shillong, Nailur 01
Ka Pay For Right Football Academy ka la pynliem noh ïa ka Mawryngkneng SC da 4-1 kol na ka bynta ban khur jingjop ha ka Second Division Football League 2025 ba la pynïaid da ka Shillong Sports Association (SSA) ha ka lah sngi U Blei.
Ha kane ka jingïakhun kaba la long ha SSA Stadium Polo, ki rangïalehkai ka PFR ki la lah ban ïakhun tyngeh naduh kaba sdang ha kaba u Endy Suting u la ïoh ban pynkhih jar nyngkong ha ka minit kaba 8. Kane ka kynhun ka la pynbud biang ïa ka kol kaba ar lymgba u Peter Strong Lamare (16).
Hadien shiteng kynta ka Mawryngkneng ka la lah ban pynphai kylla shi kol lyngba u Mebalabiang Myrboh (34) hashwa ba u Peter (48) un pynbud biang ïa ka kol kaba ar jong u na ka bynta ban pynlong ïa ka PFR ban khur syndon ïa ka jingjop.
Haba phai sha kawei pat ka jingïalehkai kaba la long kham hashwa hapdeng ka Sohryngkham SC bad ka Tynring SC ki la ïasam mar shi poiñ hadien ba kim shym la lah ban thep kol haduh kaba kut ka jingïalehkai.
Ha ka sngi Ba-ar ka jingïalehkai kan long hapdeng ka Mylliem Lum SC pyrshah ïa ka Lumshyiap SC ha ka por 11:15 mynstep, katba ka Sohïong SC ïa ka Umphrup SC ha ka por 1:45 mynsngi.
