Shillong, Nailur 01
Ka jinglong manager u Erik Ten Hag ïa ka Bayer Leverkusen ka la kut noh kynsan, ha kaba kane ka lahduh jong ka Bundesliga ki la sloit noh ïa u tang hadien ba u la shimti ban pynïaid ha ki ar tylli ki jingïalehkai.
Utei u manager uba na Netherlands, uba la shimti ha ka jaka u Xabi Alonso, hadien ba u la leit shimti ïa ka Real Madrid, ula shah weng noh tang hadien ar bnai ba u la shimti ïa kane ka kam.
“Kane ka rai kam shym la long kaba suk ïa ngi. Ym don ba kwah ban shim ïa kane ka sien jam”, la ong u Sporting Director u Simon Rolfes ha ka kyrwoh. U la bynrap da kaba ong, “Ki khyndiat taïew ba la dep ki la pyni ba ki sien jam ban tei ïa ka kynhun kim shym la long kiba seisoh.”
U CEO jong kane ka klob, u Fernando Carro, u la kam ba katei ka rai ka long kaba eh, hynrei kaba ym lah ban kiar. “Ka rai ka long kaba sngewsih, hynrei ka long kaba donkam ban shim.”
Kane ka jingshah weng kam ka pynlong ïa u Ten Hag, uba 55 snem ka rta, kum u coach uba kloi eh ban shah pynkut ha kane ka kam kaba u bat ha ka samoi ïalehkai jong ka Bundesliga.
U Ten Hag, uba la shah thung ban shimti ïa katei ka kam ha ka 1 tarik u Naitung, u la ïoh ban pynïaid tang lai tylli ki jingïalehkai. Hadien ka jingjop ha ka German Cup da 4-0 kol pyrshah ïa ka Sonnenhof Grossaspach, ka Leverkusen ka la ïakynduh jingeh ha ka league. Ka la shah rem noh da 2-1 kol ha la ïing pyrshah ïa ka Hoffenheim kumjuh ka la ïakhaid mar 3-3 kol bad ka Werder Bremen. Ka jingshimti kaba nyngkong eh jong u Ten Hag ka dei ha ka jingïalehkai paralok pyrshah ïa ka kynhun ïalehkai Under-20 jong ka Flamengo ha Brazil, ha kaba kala la shah rem da 5-1 kol.
Ka jinghiar u Ten Hag ka la wan hadien shi snem hadien ba shah weng noh ha ka Manchester United ha u Risaw jong u snem 2024, watla u la lah ban pynjop ha ka FA Cup bad League Cup.
