Shillong, Nailur 01
Ka Hynñiewtrep Youth Council (HYC) War Jaiñtia ha ka 01 tarik u Nailur 2025 hapoh ka jingïalam u samla Youdahunki Shylla ka la leit ban ïakynduh markhmat ïa ka Director of Health Service (MI) halor ka jingbym ïoh ïa ka jubab jingdawa ba la palat la shi snem tam mynta.
Ka jingdawa ka seng HYC War Jaiñtia ka long, ban shna pynbha, ban ai ïa ki jingdon kam jong ki Primary Health Center ha Pdengshakap, ha Jarian bad ha Dawki lem bad ïa ka State Dispensary ha Padu, ban shna pynbha ïa ka Community Health Center Nongtalang.
Haba kren sha ki lad pathai khubor u samla Youdahunki Shylla u la ïathuh ba ka HYC ka la buh ïa kane ka jingdawa da ka jingthoh ha u snem 2024, ha ka Director of Health Service (MI) bad haduh mynta kim pat shym la ïoh jingtip eiei kaba la pynlong ïa ki ba kin leit kynduh syndon ïa ka DHS ha ka 01 tarik U Nailur 2025 ha ka kamra treikam jong ka, kaba don ha Laitumkhrah.
Hadien ka jingïakynduh bad ka Director of Health Service (MI), u nongïalam ka HYC, u samla Youdahunki Shylla u la ong ba ki dap da ka jinglyngngoh kaba khraw ba ka jingthoh kaba ki la dep ban buh ha ka Director barim ha u snem ba ladep kam shym la poi sha kti ka Director kaba wan shimti thymmai mynta.
“Ka seng ka la kren shai hakhmat ka Director ba kan shimkhia ïa kine ki mat jingdawa ka seng ba kan kyntiew kyrdan noh ïa ki Primary Health Center. Naduh u snem 2023 ka seng ka la ïakynduh teng bad ka Kong Ampareen bad I la kular ban sa pynlong ka jingleit jurip, hynrei na kidaw bym lah kiar kam shym la wan shuh. Kumta ka seng ka la phah ka khubor kaba shai sha i Kong Ampareen ba ka seng kam donkam shuh ba phin wan jurip hynrei ka seng ka dawa ba ka dei ban pynurlong noh ïa ki mat jingdawa jong ka seng” la ong u samla Youdahunki.
U la ong ruh ba ka jingdonkam ha kitei ki jaka sumar ha ka thaiñ kim lah shuh ban ap ïano ïano ruh namar kane ka jingdawa ka seng kadei kaba donkam eh.
Shuh shuh u ong ba mynta ba la wan da kawei ka Director kyrmen ba kine ki mat jingdawa ka seng kin sa urlong noh ban myntoi ki paidbah.
Nalor kata u la ong ruh ba ha ka jingïakren bad ka DHS, ka la kular ban shim khia, bad ka pyntip ba ki don ki bynta kiba kin sa leh kham kloi bad ki don kiba kin dang hap ban ap shwa.
