Shillong, Nailur 01
Ka Rangdajied United FC ka la khur ïa ka jingjop ha ka Shillong Premier League 2025, hadien ba ka la lah ban pynliem noh ïa ka Nongrim Hills da 1-0 kol ha ka lah sngi U Blei ha SSA Stadium kaba ha First Ground, Polo.
Kane ka nam jop ka la wan urlong lyngba ka shi kol ba la ïarap pynthep da u rangïalehkai ka Nong-rim Hills, u Shanborlang Thangkhiew ha ka minit kaba 74, kaba pynlong ïa ka Rangdajied United ban khur ei ïa ka lai point na kane ka jingïakhun.
Kine ki ar tylli ki kynhun ki dei ki bym pat shym la lah ban khur jingjop ha ki jingïakhun kiba ki la dep, ha kaba ka Rangdajied United ka la ïakhaid khlem don ba la lah ban thep kol pyrshah ïa ka Shillong Lajong FC, katba ka Nongrim ka la shah rem da 4-0 kol ha ka Langsning FC.
Kane ka kol kaba la kum thep bakla da u Shanborlang, ka wan hadien ba u Bantiplang Khongnoh u la shut shapdeng ïa ka bol, kaba kum shut bynta ba un nym ailad ïa u Manbhalang Ïawphniaw ka Rangdajied ba un nym ïoh ia ka, hynrei phewse ka la rung jlang sha la ka jong ka kol.
Da kane ka jingjop, ka Rangdajied United ka ka la ïoh ba kan khur 4 point, katba na ka liang ka Nongrim Hills, ka ïai bteng ban mad ïa la ki sohkthang jong ka, hadien ba la mad ïa baroh lai sien lynter ki jingshah rem ha kane ka lympung.
Ha ka sngi Ba-ar, ka jingïakhun kan long hapdeng ka Shillong Lajong FC pyrshah ïa ka Laitkor SC ha ka por 4:30 nohphai sngi. Lada ka Lajong ka khur ïa ka nam jop kan kiew sha ka kyrdan ba-ar, katba lada jop ka Laitkor kan kiew sha ka kyrdan balai.
