Shillong, Nailur 01
Ka Fedora Tynsong Lyng -doh ka long tang marwei ka khynnah kynthei Khasi napdeng ki 40 ngut kaba la ïashim bynta ha ka 5th State Level Yoga-sana Sports Championship 2025, ïa kaba la pynlong da ka Meghalaya Yoga-sana Sports Association, ha Bharat Scouts & Guide.
Ka Fedora haba pynpaw ha ki nongthoh khubor ka la ïathuh ba ka dei ka khynnah kaba dang pule Class-X ha Pule Eriben Presbyterian SS bad ka shong ka sah ha Nongthymmai Dumdum. Ka la ïathuh ba ka la sdang ba kan kilan met ha ka jingïalehkai Yogasana ha u snem 2018, hadien ba ka la leit kai lang bad la ki paralok, ha kaba ka la sdang ba kan ïalehkai lang bad mynta ka kylla long kawei na ki jingïalehkai kiba ka sngewtynnad.
Haba kylli ba balei ki khynnah Khasi kim da smat ban ïalehkai ïa ka Yogasana, ka Fedora ka pynpaw ba lehse kam dei ka jait jingïalehkai kaba baroh ki sngewtynnad, ha kaba don ruh kiba ñiew ne shim ba ka long pynban kum ka kynja dustur jong ki Hindu.
Kumba ka long ïa mynta, ka Fedora ka pynpaw ba ka buh mynta halade ïa ka thong ba kan ïoh ban mihkhmat ïa ka Jylla ha ka National Games ka ban long ha u 2027 hangne hapoh ka Jylla bad kyrmen ruh ba kan ïoh ban khur ïa ka takma.
Ha kawei pat ka liang u Bah Danial Dunai u la ïathuh ba kane ka kynti kaba mynta, la don kumba 40 ngut ki khynnah kiba la wan ban ïashim bynta na ki synjuk ïalehkai Yogasana jong ki district bapher bapher jong ka Jylla.
Ïa ka jingïakob la phiah ha ka kyrdan Sub-Junior, Junior bad Senior, bad ïa ka jingïakob la phiah kum ka traditional event, artistic event, artistic pair, bad na kane ka jingïakob ka synjuk kan jied ïa ki khynnah ba kin mihkhmat sha national level yogasana championship bad ha ka juh ka por ka long artad kum shi bynta ka jingpynkhreh ban saiñ dur ïa ka kynhun ban ïashim bynta ha ka National Games ka ban long ha kane ka Jylla ha u snem 2027.
