Washington, Nailar:
Katkum ki khubor, la ong ba ka sorkar US hapoh ka jingïalam jong u Donald Trump, ka la tyrwa ïa ki kyndon ‘Visa’ ba thymmai kiba pyrkhing bha naka bynta ki nongthoh khubor na China kiba don ha US, kum shi bynta jong ka jingpynbor kaba kham heh ban pynduna ïa ka jingsah jong ki samla pule bad ki nongthoh khubor nabar ri, ha kane ka sienjam ba nyngkong jong ka jingpynbor ka US ïa ki briew ka China.
Kane ka aiñ thymmai, kaba la thoh ha ka jingtyrwa jong ka tnat pahara ri, kaba la pynmih ha kane ka taïew ba la dep, kan ailad tang katto- katne tylli ki visa jong ki nongthoh khubor jong ka ri China bad kane ka jingpyrkhing kan treikam haduh kumba 90 sngi eiei, ha ryngkat bad ka jinglah ban pynjlan shuh-shuh ïa katei ka rai. Ki nongthoh khubor na kiwei pat ki ri kin mad ïa ka jingshah khang kaba 240 sngi, kaba pynduh noh ïa ka polisi kaba mynta kaba ailad ïa ki ban sah katba ka kam jong ki ka dang neh.
Kane ka jingbuh kyndon kaba 90 sngi kan pyn-im biang ïa ki kyndon pyrkhing kiba u President Donald Trump u la thaw lad ban wanrah naduh kaba kut jong ka samoi treikam ba nyngkong jong u, kiba u President barim ka US- u Joe Biden, u la weng noh shuwa ba yn ioh ban pynlong aiñ. Kane ka jingtyrwa kan ïakynduh ïa ka por ban ai jingmut paidbah kaba 30 sngi.
U nongaiktien jong ka tnat kam bar ri ka China, u Guo Jiakun, u la ong ba ka ri ka pyrshah ïa ki “jingleh donbor bad ki jingpynmih aiñ ba khlem nongrim jong ka US, pyrshah ïa ki katto- katne ki ri ba ka US ka sngewshon.”
Katba ki heh sorkar jong ka US, ki la kynthoh la slem bah ba ki ailad kham bun ki nongthoh khubor na China ban rung sha US ban ïa kaba ka sorkar China ka ailad ïa ki nongthoh khubor na America. Ha ka samoi treikam ba nyngkong jong u, u Trump, u la bthah ruh ïa ki lad pathai khubor jong ka sorkar China, ba kin pynduna ïa ka jingbun jong ki nongtrei jong ki, kiba don ha US, kum ka jingkynthoh ïa ki jingkhang jong ka Beijing, ïa ki nongthoh khubor jong ka America.
Kane ka DHS memo ka wanrah ïa ki jingpyrkhing kiba thymmai naka bynta ki samla pule bad ki nongwan jngohkai pyrthei, da kaba khanglad ïa ka jingsah jong ki haduh saw snem tam. Katkum ka jingtyrwa, ka jingailad ïa ki samla pule ban sah ha US khlem ki kyndon kiba pyrkhing “ka la pynshlur ïa ki ban leh ïa ki kam thok bad ki kam runar ba ha rukom.”
Ka tnat DHS ka la ong ruh ba “La bun snem, ha ka por ki nongsynshar kiba la leit, la ailad ïa ki samla pule nabar ri bad kiwei- kiwei ki nongbat Visa ban sah ha US khlem kino- kino ki kyndon lane ka por ba kin ïoh ban shong- ban sah ha kane ka ri bad la ong ba kane ka la wanrah jingma ïa ka jingshngaiñ ha ka imlang- sahlang jong kane ka ri, kaba pynlut ïa ka pisa jong ki nongsiew khajna kaba ym lah ban batai bad kaba pynduhnong ruh ïa ki nongshong shnong jong ka US.”
Kane ka jingtyrwa ka ïahap bha bad ka jingpynshitom beiñ jong u Trump ïa ki nongwan buhai shnong, kiba u Trump u kheiñ ba ki dei ki phetwir, kaba la pynlong ruh ïa ka sorkar ba kan hap ban pynjur ïa ka jingpynduh ïa ki Visa, ban khang ïa ki nongshong shnong na ki katto- katne ki ri ban rung sha US bad ban beh noh ïa ki hajar ngut ki nongwan buhai shnong kiba khlem kot- khlem sla.
Ka China ka la long ka jaka ba la buh jingmut bha, watla ka bor synshar ka la ai ïa ki khubor kiba ïa pyrshah halor ka rukom treikam jong ka. Ha kaba sdang jong une u snem, u Secretary jong ka ri u Marco Rubio u la ong ba ka US kan sdang “da kaba tyngeh” ban weng noh ïa ki visa ïa ki samla pule na China halor ka jingïadei bad ka seng synshar Communist lane lada ki don ha ki bynta ba kongsan. Hynrei ha kaba sdang jong kane ka taïew, u Trump u la ong ba ka US kan ailad ïa ki 600 hajar ngut ki samla pule na China ban rung sha kane ka ri, da kaba bynrap ba “ka long kaba kongsan bha.”
