Jowai, Nailur 02
Ka Mukhla Raij ka la pynliem noh ïa ka Nongkhroh Krem Kum da 3-0 kol na ka bynta ban khur ïa ka jingjop ha ka Super Division Football Tournament ba la pynïaid da ka Thadlaskeiñ Sports Association (TSA) ha ka sngi Ba-ar ha Wahïajer Multi-Sports Complex.
Ha kane ka jingïakhun ka Mukhla Raij ka la lah ban ïalehkai bha naduh kaba sdang ha kaba u Chandame Suna u la pynkhih jar nyngkong eh ha ka minit ba 28 na ka bynta ban tam shi kol ha ka kylla step. Kane ka kynhun ka la thep biang sa ar kol ha ka kylla miet lyngba u Player Suna ha ka minit ba 80 bad u Banlam Mawlong (87) na ka bynta ban khur syndon ïa ka jingjop.
Haba phai sha ka 2nd Division, ka Tympang SC ka la jop da 2-1 kol ïa ka Myngkrem. Ïa kine la thep da u Rimiki Phawa ha ka minit ba 8 bad u Damehi Lakiang (39). Hynrei ka Myngkrem ka la pynphai kylla shi kol lyngba u Dalamsarki Lapasam (19).
Ha ka jingïalehkai kaba bud, ka Maya SC ka la jop da 5-0 kol ïa ka Pdieñlum. U Preshan Supuh u la thep ar kol ha ka minit ba 24 & 44, katba ïa kiwei pat la thep da u Pormi Pale (47), kumjuh u Shaimi Phawa (50) bad u Iaidmi Pale (67).
Ha ka sngi Balang ka jingïalehkai 2nd Division ha ka por 10 baje mynstep kan long hapdeng ka United FC Ummulong pyrshah ïa ka Mupliang RC Club bad ha ka por 12 baje mynsngi ka Madur kan ïakynduh pyrshah ïa ka Ryntih Mynsngat. Ha ka Super Division ka ban long ha ka por 3 baje nohphai sngi kan long hapdeng ka Wahïajer pyrshah ïa ka Pohskur Phyllong Iingkhaw.
