Jowai, Nailur 02
Ka lympung ïalehkai 3rd Division bad 2nd Division Football Tournament 2025 ba la pynïaid da ka West Jaiñtia District Sports Association ka la nangjam shaphrang ha ka sngi Ba-ar ha Kiang Nangbah Stadium Dongmihsngi, Jowai.
Ha ka jingïalehkai jong ka 3rd Division hapdeng ka Lumsliarsliar Mupliang bad ka Lumchyrmang Mihmyntdu ki la ïakhaid mar 1-1 kol. Ïa ka kol na ka Lumsliarsliar Mupliang la thep da u Powerful Ryngkhlem ha ka minit ba 25, hynrei ka Lumchyrmang Mihmyntdu ka la pynphai kylla lyngba u Wompher Chyrmang ha ka minit ba 51.
Ha ka jingïalehkai kaba bud, ka Saiñdur Mihmyntdu ka la pynliem noh ïa ka Lion Social & Cultural SC da 1-0 kol bad kane ka la wan urlong lyngba u Wanlambha Pongrup ha ka minit ba 33.
Ha kawei pat ka jingïakhun, ka Youth Welfare Iooksi SC ka la pynliem da 2-1 kol ïa ka Tpep-Pale. Ïa ki kol na ka bynta ka Youth Welfare Iooksi la thep marwei da u Sammaia Sumer ha ka minit ba 6 & 56. Katba ïa ka shi kol na ka Tpep-Pale la ïarap pynthep da u rangïalehkai ka liang pyrshah u Nangtei Sumer ha ka minit ba 70+1.
Haba phai sha ka 2nd Division, ka Luti Tuber Social Welfare ka la pynjem khnap ïa ka Umlangchor Mukhla da 5-0 kol. U Kynsai War u la thep ar kol ha ka minit ba 46 & 75, katba ïa kiwei pat la thep da u Medaya Dhar (55), Ïohbhah War (77) bad u Wyrchar Dhar (80+1)
