Shillong, Nailur 02
U Myntri ka tnad Social Welfare, Bah Paul Lyngdoh ha ka Sngi Ba-ar u la kyrpad ïa ki Dorbar Shnong ban ïatreilang bad ka Sorkar ban ïakhun pyrshah ïa ka jingma jong u drok da kaba thaw ïa ki Village Defence Party (VDP) ha la ki jong ki jong ki shnong.
Haba kren sha ki lad pathai khubor, u Bah Lyngdoh u la ong ba ka Sorkar ka la pynthymmai bad kyntiew ïa ka song pisa na bynta ki dkhot ka VDP – na ka T.800 sha ka T.3000 shisnem.
Katkum ka jingong jong u, ki dkhot ka VDP kin ïarap ïa ka tnad pulit da ki jingtip bad ki jingkdew lynti, khlem da donkam ban don ha surok 24 kynta.
U Myntri ha kawei ka liang u la pynpaw ka jingsngewkhia ba wat hapdeng ki jingpyrshang jong ka Sorkar, ki don tang 11 tylli ki VDP ha Shillong, ka nongbah sor kaba don palat 6 lak ngut ki nongshong shnong.
“Nga la ïakren bad ka Dorbar Shnong ha ka jingïalang kaba la wan bun ngut ki briew ha NEC, Nongrim Hills ha kaba baroh ki Dorbar Shnong ba heh jong ka Shillong ki la wan ïashim bynta bad ngi kyrpad ïa ki ban shim ïa ka skhim VDP naba ka VDP kaba dei ka kynhun kaba ithuh da ka aiñ bad ka ban ai ruh sha ki ka jingïada katkum ka aiñ bad kaba treikam lang bad ka tnad pulit,” u la ong.
“Ngan kyrpad ïa ki Dorbar Shnong ban wan shakhmat bad ban shim kabu ïa ka jingtyrwa jong ka Sorkar Jylla namar kane kam dei ka Sorkar pyrshah ïa ki paidbah, kane ka dei ki paidbah ryngkat lang bad ngi ban ïakhun pyrshah ïa ka jingma u drok,” bynrap biang u Bah Lyngdoh.
Ka Sorkar ka la ai ruh ka jingïarap pisa sha ki pulit ANTF bad ki ‘Volunteer’, da kaba ithuh ïa ka jingtrei shitom jong ki ha ka jingïaleh pyrshah ïa ka jingkhaïi drok.
“Kumba phi lah ban ïohi, ka ANTF mynta ka dei ka kynhun pulit kaba pura hapoh ka jingïalam u SP ryngkat ki kali bad ki briew lajong kiba la shah hikai. Ki jaka ki bym shym la hap hapoh ka jingkhmih jong ki ha ki por ba la leit, kum ka nuksa, ka thaiñ Cantonment, Ïewduh, ki ANTF jong ngi ki don hangta la jan man ka sngi. Bad na ka bynta uno-uno ban leit da ka met bad ban kem ïa ki suba nongkhaïi, kane hi ka long kaba be-aiñ bad ka buh jingma ruh ïa ka koit ka khiah jong u briew uba lah ban ngat ha ki thyrnia injek bad kiwei-kiwei kiba kum kita,” u la ong.
