Jowai, Nailur 02
Ka jingïakynad hapdeng ki Pnar bad ki Karbi ha ka thaiñ Lapangap-Tahpat ka dang thnem jur bad ka la wanrah ïa ka jingbym shngaiñ wat ïa ki jingri jingdup ha katei ka jaka khappud.
Katkum ka khubor kaba la ïoh la kynnoh ba ki katto katne ki jaidbynriew Karbi kila sdang ban pynmynsaw wat ïa ki masi ba ri da ki Pnar ha shnong Lapangap da ka ot ïa ki da ki tiar ba nep bad beh ruh ïa ki masi ba sharai sha ki lum ki wah sha ka liang ba sah ba shong ki Karbi.
U Waheh Shnong ka Lapangap u Ma Deimonmi Lyngdoh haba pyntip ïa kane ka jingjia, u la ïathuh ba ha ka 28 tarik Nailar, 2025 katba ki khynnah na ka shnong Lapangap ki dang ïalam pynbam phlang ïa ki masi sha Lum Pynthor, la wan shi kynhun ki nong Karbi kiba la beh jubor ïa uwei u masi sha ka liang ka shnong Tahpat ba shong ba sah da ki Karbi.
U la ong ruh ba ïa kiwei pat ki masi, kine ki nong Karbi kila ot bad tar dusmon da ka tari haduh ban da mynsaw.
Halor kane ka jingleh jong ki Karbi, u la ong ba na ka liang ka shnong Lapangap kala dep ban pyntip sha ki bor pynïaid District jong ka West Jaiñtia Hills bad ruh kala dep ban ïakren bad ki bor pynïaid shnong jong ki Karbi khnang ban pynphai ïa utei u masi ba ki Karbi kila bat, hynrei haduh mynta ki khlem pynphai satia.
Une u masi ba shah bat ha ki Karbi la dei trai da u Ma Karchom Siangshai.
