Shillong, Nailur 02
Ka Joint Action Committee (JAC) jong ki sengbhalang ka Raid Sawsymper ki la leit ban ïakynduh ïa u Chief Executive Member (CEM) ka Khasi Hills Autonomous District Council (KHADC) u Bah Shemborlang Rynjah ha kaba ïadei bad ka mat kaba la slem bha ba ka la dawa ban pynhiar khet noh ïa u Syiem ka Hima Maharam.
Haba ai jingkren hadien ba la mih na kamra u CEM, na ka liang u Bah G Kharraswai uba dei u chairman ka JAC u la ïathuh ba kane ka jingdawa ban phah hiar khet ïa u Syiem ka Hima Maharam ka dei kaba la slem naduh ki EC ki barim hapoh ka District Council.
U Bah Kharraswai u la ïathuh ba ka JAC kala dawa ïa u Syiem Maharam ban hiar shuki ka dei ba ha u snem 2021 u Syiem Maharam u la pynmih ïa ka jingpyntip ba hapoh ka Raid Sawsymper ïa ki jaka ki puta jong ki khun ki hajar yn shim khajna noh katkum ka bhah haba ïadie ïathied ïa ki jaka lane ai sha ki kompani kata 50% ïa u Syiem, 20% sha ka Dorbar Raid, 20% sha u trai jaka bad 10% sha ka Dorbar Shnong bad dei halor kata ka nongrim ba ka JAC bad ki khun ki hajar ka Raid Sawsymper kim sngewïahap bad kila pyrshah jur ïa ka jingleh u Syiem Maharam.
Na ka liang u Bah Kharraswai u la ong ba na ka liang ka JAC ka burom ïa ka soskular 1944 ba la ïateh da u Syiem Bamonsing Syiem, u Syiem Maharam ha kito ki por bad ki rangbah ka Raid Sawsymper, ba hapoh ka Raid Sawsymper yn synshar khlieh briew ym dei ba u Syiem un synshar ïa ki jingdon jingem.
Ha ka jingïakren bad u CEM u Bah Shemborlang u la kular sha ka JAC ba un sa khot noh ïa ki ophisar ka District Council ban ïa bishar bniah halor kane ka kam bad lada ka kam ka dei hok na ka liang ka District Council kan leh ïa kaba dei ban leh.
