Washington, Nailur:
Katba ki 20 ngut tam ki nongmihkhmat nabar ri ki dang ïalum lang ha ka nongbah Tianjin jong ka China naka bynta ka jingïalang jong ka Shanghai Cooperation Organization (SCO), u Myntri Rangbahduh ka ri u Narendra Modi bad u President ka Russia u Vladimir Putin ki la ïakynduh markhmat bad ki la ïoh ban ïa khublei kti bad ki la ïa kdup ieid ruh markylliang ban pynpaw ïa ka jingiadei kaba jan eh bad kaba skhem hapdeng jongki. Kitei ki arngut ki nongialam, ki ban sa pynlong ia ka jingialang jong ki arliang mamla, ha katei hi ka sngi, ha marjan jong ka jingialang jong ka Summit bad ki la iakynduh ha ka sien kaba nyngkong, hadien ba ka US, ka la pynjari ia ka khajna, kaba 50% ia ka India, halor ka jingshalan umphniang jongka, na Russia.
U PM Modi, ha ka jingthoh jong u ha ka rynsan ‘X’, u la sam ia ki dur bad u nongialam jong ka Russia, da kaba ong ba ka long “ka jingkmen kaba khraw ban iakynduh ia u”.
Kiwei pat ki video bad ki dur na ka jaka ba la pynlong ïa ka SCO Summit, ki pyni ïa u PM Modi, u Putin, bad u President ka China, u Xi Jinping, ba ki ïasam lang ïa ka khyllipmat jong ka jingkmen ryngkat ki jingphuh samrkhie bad ka jingïakynduh kti.
U PM u la ïasam ruh ïa ki jingïohi jong ka jingïadei jongki, da kaba pynpaw ïa ka jingïadei paralok hapdeng kine ki 3 ngut ki nongïalam. “Ki jingïakren ha Tianjin ki dang ïai bteng! Ka jingïasam jingmut bad u President Putin bad u President Xi ha ka por jong ka jingïalang jong ka SCO,” u la thoh.
Ki dur jong ki 3 ngut ki nongïalam kiba sngap jar bad ki ïakren ki pynkynmaw ïa ka dur kaba kum kane kaba la shim ha ka por jong ka jingïalang jong ka BRICS ha u snem 2018. Ka jingïadei paralok hapdeng ki 3 ngut ki nongïalam ka long ruh ha kune ka por ba ka jingiadei hapdeng kitei ki 3 tylli ki ri bad ka US, ka la sniew bad tlor bha ha kine ki sngi.
Ha ka Sngi U Blei, u PM Modi, u la pynlong ïa ka jingïakren arliang mamla bad u Xi Jinping, ha marjan jong ka SCO Summit, kaba la neh kumba 50 minit eiei, ha kaba kitei ki 2 ngut ki nongïalam, ki la kular ban pynbeit ïa ki jingïapher khappud bad ban pynkhlaiñ biang ïa ka jingïatreilang. Ha ka jingkren plie jong u, u PM Modi u la ong ba u “angnud” ban kyntiew ïa ka jingïadei hapdeng ka India bad ka China da kaba pynshong nongrim ha ka jingshaniah markylliang, ka jingburom mar kylliang bad ryngkat ruh ka jingsngewrit.
Kane ka dei ka jingleit jngoh kaba nyngkong jong u PM Modi sha China hadien hynñiew snem, khamtam ba ka jingïadei hapdeng kine ki ar tylli ki ri ka la kylla sniew hadien ka jingïakynad kaba la wanrah ïa ka jingïap briew ha Galwan ha u snem 2020.
