Shillong, Nailur 02
Ka jingbei tyngka jong ka Sorkar Jylla ha ki tamasa bad ki prokram bapher-bapher ka la ïalam sha ka jingïohnong ha ka ïoh ka kot kaba T.133.43 klur ha u snem ba la dep.
Ïa kane la pynpaw da u Myntri ka tnad kam jngohkai pyrthei, Bah Paul Lyngdoh ha ka Sngi Ba-ar ha ka por ba pyllait ïa ka ‘Autumn Calendar 2025’ jong ka Jylla kaba thmu ban kyntiew ïa ka tnad ki kam jngohkai pyrthei.
“Ka Jylla ka la bei T.23.50 klur ha ki prokram bapher-bapher ha u snem ba la dep, kynthup ïa ka ‘Me-gong Festival’, ‘Shillong Cherry Blossom Festival’, bad ka ‘Literary Festival’, bad kiwei-kiwei. Ka jingmih na ka jingbei tyngka ka long kaba heh, kata haduh T.133.43 klur,” u la ong ha ki nongthoh khubor.
U Bah Lyngdoh u la pyntip ba ka ‘Shillong Cherry Blossom Festival’ kaba la pynbeit ban pynlong ha ka 14 bad 15 tarik u Naiwieng mynta u snem, ka la wanrah ïa ka jingkyntiew kaba khraw ha ka ïoh ka kot ha u snem ba la dep, ha kaba ka Sorkar Jylla ka la bei pisa T.5 klur bad pynmih T.59.98 klur ha ka jingmyntoi ha ka liang ka ïoh ka kot.
Katkum ka jingong jong u, ka mang tyngka mynta u snem la shu buh lypa T.4 klur.
“Ha kane ka kynti, ïa ka ‘Shillong Cherry Blossom Festival’ yn pynlong ha Shillong, ha Madan J.N. Stadium. Khnang ban ai ïa ki nongwan jngohkai sha kane ka tamasa ïa ka jingsngew kaba pher bak-ly-bak ha kaba kan don ka jingïaid kjat bad baroh kawei ka lynter surok kaba ïalam sha Madan Polo kan long kaba ïaid kjat ha baroh 2 sngi jong ka tamasa. Kumjuh, ngin don ki ‘Stall’ bad ki jingpyninam bapher-bapher katba ki nongwan ki dang ïaid sha ka Madan,” la pynpaw u Myntri.
Kane ka tamasa kan sakhi ïa ar tylli ki ‘International Act’ ha ka sngi nyngkong jong ka.
U Bah Lyngdoh u la pynbna ba u Jason Derulo bad ka kynhun ‘The Script’ kin long ki bynta ba kongsan jong ka tamasa, ha ryngkat ka puron ba paw ka India, ka Nora Fatehi.
Kiwei pat ki tamasa katkum ka almanak ki kynthup ïa ka ‘Meghalaya Kayak Festival’ naduh ka 14-18 tarik u Risaw, ka ‘7th Ahor 4×4 Offroad Challenge’ naduh ka 23-25 tarik u Risaw, ‘Shillong Literary Festival’ naduh ka 20-22 tarik u Naiwieng, ka ‘Me-gong Festival’ naduh ka 28-29 tarik u Naiwieng bad ka ‘Winter Tales’ naduh ka 11-13 tarik u Nohprah.
Shuh shuh, u Myntri u la pynpaw ba ki jingpyrshang ka Sorkar ban kyntiew ïa ki sap ki phong na ka thaiñ lyngba ki sienjam kum ka prokram CMJMP kaba man ka sngi, kaba la pyni bad sei madan ïa palat 7,000 ngut ki ‘riew don sap.
“Bun ki kynhun tem bad ki nongtem na la ka jong ka thaiñ kiba hashuwa ki ju ïashim bynta shabar jong ka Jylla, mynta ki pyni la ka sap jong ki ha Meghalaya bad wat ha ka pyrthei kumjuh. Katto-katne ki nongrwai kin sa ïashim bynta ha Singapore ha u bnai ban wan,” u la ong.
U Bah Lyngdoh u la pyntip ruh ba ka Sorkar ka phaikhmat ban kyntiew ïa ki jingtei ha ka kam jngohkai pyrthei, kynthup ban pynïasoh ïa ki shnong lyngba ki ‘Tourism Circuit’.
Ka ‘Tourism Policy Document’ ka batai ïa ki jingthmu ban kyntiew ïa ka tnad ha ka rukom kaba pura. Ka jingbei tyngka ha ki jaka ‘5-star’ ha Umïam bad Sohra la khmih lynti ba kan khring ïa ki nongjngohkai pyrthei kiba heh spah bad kan kyntiew ïa ka ïoh ka kot.
“Hapoh ki lai snem ban wan, ngi dei ban lah ban ïohi ba kine ki jingbei tyngka kiba heh ha ka laiñ ‘Hospitality’ khamtam ha ki ‘Hotel’. Mynta ngin sa don sa ar tylli ki jaka ‘5Star’ ha Umïam bad ar tylli ha Sohra. Nangta ngi don ïa ka ‘Rain Museum’ ha Mawsynram, ka ‘Mawmluh Experimental Cave’, kine baroh ki ban sa nang kyntiew ïa ka jingshem bad jingsngewtynnad jong ki nongwan jngoh kai pyrthei kiba wan sha ka Jylla,” u la ong.
