Shillong, Nailur 02
Ka Hynñiewtrep National Youth Front (HNYF) Mawryngkneng Circle ka la ïoh ban bat ïa ki bar jylla kiba thmu ban wan trei bylla hapoh ka jylla bad ki bym biang ïa ki kot ki sla.
Ka Seng ka la pyntip ba katba ki dang pynlong ka jingtalasi kumno ban tehlakam ïa ka shongsuk shongsaiñ hapoh ka shnong ha ryngkat ka jingïatreilang bad ka Seng Samla Shnong, ki la lap ïa 4 ngut ki barjylla kiba wanrung hapoh ka Jylla katba ki dang hiar na kawei ka trok.
Haba ka Seng ka la tohkit ïa kitei ki barjylla, ki la ïathuh ba ki wan na ka jylla Assam hynrei ka Seng kam shaniah namarba kim don ïa ki kot ki sla kiba biang ban pynshisha ba ki dei naei.
Na ka liang ka Seng ka la aiti noh ïa kine ki bar jylla sha ki bor Pulit ba kin pynlong ïa ka jingtohkit ïa kitei ki barjylla.
Shuh-shuh, ka Seng ka la kyntu ïa ki bor ba dei peit ïa ka tnat Labour ba ki dei ban shimkhia ba haba ki khot bylla ïa ki briew kiba nabar jylla ki dei ban pynbiang ïa ki kot ki sla khnang ban pynduna ïa ka jingrung kyrthep jong ki briew kiba nabar hapoh ka jylla.
Ka Seng kala lap ruh ba ki kot ba kine ki barjylla ki ïoh ka dei na Jaiñtia kata ruh tang ka Acknowledgement Slip bad ka tarik ruh ka dei ha katei kajuh ka sngi hi.
Ka Seng kala ong ba kitei ki barjylla ki thmu ban wan trei sha East Khasi Hills da kaba bynrap ba kaba sngewlyngngoh ka long ba kumno kine ki barjylla ki nud ban wan bylla haba ki tip ba ki dang shu ïoh tang ïa ka Acknowledgement Slip ne hato ki don kiba ïarap ïa ki ban pynleh ïa ki kot ki sla.
“Ka jingkyntu jong ngi ka long ïa kiba dei peit ïa ka tnat Labour ba ki dei ban khmih bniah bha bad kaba sngewlyngngoh ka long mynne ki dang aplai ïa ki kot donkam hynrei mynta ki la ïoh ban rung bad trei da kaba suk”, ong ka Seng.
Kumjuh ruh, ka Seng ka la kyrpad ïa ki nongñiah kali ba ki dei ban peit pyrman bha haba ki thep ïa ki nongshong kali kiba dei nabar, bad maham ruh ba lada ka Seng ka lap kan sa leh da kaba tyngeh.
