Shillong, Nailur 02
Ki nongïalam ka Federation of Adhoc School Teachers of Meghalaya (FASTOM) ha ka 02 tarik u Nailur 2025 ki la pynbna ba kin sa mih sha surok ban pynlong da ka jingïakhih pyrshah ïa ka Sorkar Jylla ka bym kyntiew ïa ka tulop ki nonghikai Adhoc ha ka Jylla.
Haba kren sha ki lad pathai khubor ha Shillong Press Club, u Vice President ka FASTOM, u Bah S.Jungai u la ong ba ka FASTOM ka la dawa na ka sorkar ïa ka jingsiew ba kham bha bad ki jingmyntoi na ka bynta ki nonghikai Adhoc, kynthup ka jingkyntiew kyrdan sha ka deficit system, ka ka jingkyntiew tulop ‘increment’ man u snem, ka jingpynjlan ïa ka rta shongthait na ka 60 sha ka 65 snem, ka shithi pynkynmaw kaba la aiti sha u Myntri ka tnad pule puthi u Rakkam A Sangma ha ka 17 tarik Lber, 2023.
“Hynrei halor kine ki jingdawa jong ka FASTOM, ka sorkar kam shym la suidñiew haduh mynta ruh” la ong u Bah S.Jungai. Ka jingdawa na ka sorkar ban kyntiew ïa ka tulop jong ki ka long namar ha kine ki sngi ba mynta, ki mar ki mata ki la kiew dor lut, u la bynrap.
Kumta u la pyntip ba ka Federation ka la rai ban pynlong ïa ka General Meeting ha ka 13 tarik Nailur 2025 ha Tura, West Garo Hills, ban rai khatduh ïa ki lynti jingïakhih bad ïa ki jingïakhih yn pynlong lang ha kajuh ka por ha Shillong bad Tura.
U Bah S.Jungai u la ïathuh ruh ba ka tulop ba ki nonghikai Adhoc ki ïoh mynta ka long T.18,000 ïa ki Lower Primary, T.22,000 ïa ki Upper Primary, T.29,000 ïa ki Secondary, T.31,000 ïa ki nonghikai Science bad T.33,000 ïa ki Higher Secondary.
Haba pynpaw ïa ka jingbym sngewtynnad halor ka kaiphod ka Meghalaya State Education Commission, u ne u nongïalam ka FASTOM u la ong “Ngi don ka jingkyrmen ba ka State Education Commission, ba la thung ha u Naitung 2023, kan pynbeit ïa ki jingeh ba ïakynduh da ki nonghikai Adhoc. Hynrei ka kaiphod ba khatduh ba la aiti sha ka Sorkar kam shym la kynthup ïa kano kano ka jingai jingmut ban siew kham bha sha ki nonghikai Adhoc”.
Shuh shuh u Bah S.Jungai u la ong ba ka Federation ka la aiti ïa bun ki dorkhas sha u Myntri Rangbah, Symbud Myntri Rangbah, Myntri ka tnad pule puthi bad sha ki Ophisar ka tnad pule puthi ka Sorkar Jylla, hynrei ki jingdawa jong ki, kim pat shym la treikam haduh mynta ruh.
U pyntip ba ka jingpynkiew tulop kaba khatduh eh ïa ki nonghikai Adhoc ka long ha u snem 2022, hadien ba ki la pynlong da ka jingïakhih. ” Ngi dang mut ba ka la biang hynrei kane kam pat biang satia”. Da kaba bynrap ruh ba shibun ki jingeh ba ki nonghikai Adhoc ki ïakynduh ha kaba ïadei bad ka pisa tyngka, namar ka jingkiew dor ki mar ki mata.
“Ngi shem shibun ki jingeh, ban pynïoh ïa ka pule ka dangle kaba bha ïa la ki khun bad ki lad jingsumar ïa la ki bahaïing hasem ruh” la ong u Bah S.Jungai.
Shuh shuh u la ong ba mynta ka la dei ka por ïa ki nonghikai Adhoc baroh ba kin ïatylli bad leh eiei noh halor ki mat jingdawa.
