Shillong, Nailur 02
Ka Mylliem Lum SC bad ka Sohïong SC ki la khur jingjop ha ka lympung ïalehkai Second Division Football League 2025 ba la pynïaid da ka Shillong Sports Association (SSA) ha ka sngi Ba-ar ha SSA Stadium kaba ha First Ground, Polo.
Ha ka jingïakhun kaba nyngkong ka Mylliem Lum SC ka la pynliem noh ïa ka Lumshyiap SC da 7-2 kol bad u Shaiborlang Kharkrang u la khur ïa ka hat-trick da kaba thep marwei haduh saw kol ha ka minit kaba 7, 26, 80 & 88.
Kumba ka paw tang mar ïasdang ka jingïalehkai, ka Mylliem Lum ka la pynkhih jar nyngkong eh lyngba u Arbunsing Warjri (1), katba ïa kiwei pat la thep da u Eliastar Nongsiej (50) bad u Lamborsing S Nongdhar (75). Na ka liang ka Lumshyiap ka la pynphai kylla ar kol lyngba u Firstborn Ïawphniaw (17) bad u Doublestar Sanglein (44).
Haba phai sha kawei pat ka jingïakhun, ka Sohïong SC ka la jop da 3-2 kol ïa ka Umphrup SC. Ïa ki kol na ka Sohïong la thep da u Wanlambok Thabah (16), Bankwis Malngiang (41) bad u Billan Rapsang (81), katba na ka Umphrup la thep da u Wanpynïar Nongbri (18) bad u Shariwell Lyngdoh (77).
Ka jingïalehkai ha ka sngi Balang kan long hapdeng ka Mawpat SC pyrshah ïa ka Jongksha SC ha ka por 1:45 mynsngi.
