Imphal, Nailur:
Ki bor pahara ki la ïoh kurup ar tylli ki bom kawang kti ki bym pat pyndonkam hajan ka Bal Vidya Mandir ha Imphal ha ka lah sngi U Blei. Kane ka jaka ka don ruh tang kumba 50 meter duna na ka ïingsah jong u MP ka Rajya Sabbha, u Leishemba Sanajaoba, uba dei u khun syiem barim jong ka Manipur.
Ki tyllong khubor kiba thikna ki ïathuh ba ïa kitei ki tiar pynbthei la lap ha ka por kumba 9.30 baje mynstep ha ka por ba ki pulit jong ka B/66 Battalion jong ka Central Reserve Police Force (CRPF), kiba la buh hapoh katei ka skul.
La lap ïa ki bom kawang kti ba ki don hajan ka khyrdop jong ka phyllaw jong ka skul.
Khlem da pynslem ka kynhun Bomb Detection and Disposal (BDDS), ha ryngkat ki pulit jong ka Imphal East distrik ki la leit sha katei ka jaka. Hadien ki pulit ki la pynthikna ba baroh ar tylli ki tiar pynbthei ki don ki tiar pynbthei kiba la jah, kaba la pynlong ïa ki ban ym lah ban pynbthei.
Ka jingïoh kurup ïa ki tiar pynbthei ha kum katei ka jaka kaba sngewkhia, ka la pynmih ïa ka jingsyier ha ka liang ka jingshngaiñ, haba kheiñ ïa ka jingjan jong ka jaka jong ka ïing syiem jong ka Manipur bad kumjuh ruh ïa ka Temple Shree Shree Govindajee, kaba la shim ba ka dei kawei na ki Temple Vaishnavite kaba kongsan tam ha katei ka jylla.
Na ka liang jong ki pulit kiba dei peit ki la buh jingujor da ka ejahar ha kaba ïadei bad kane ka jingjia. Ym don ki kynhun lehnoh ne ki kynhun ba don hapoh khyndew kiba la shim ïa ka jingkitkhlieh ban buh ïa ki bom.
