Shillong, 2 Nailur
U nongwad Right To Information (RTI) ka jylla u Bah Disparsing Rani u la ïathuh ba u la dep ban pan ïa ka RTI na u BDO halor ka jingslem ban shna ïa ka Community Hall, Nongshken. Bad halor ka jingujor jong u da ka RTI mynta ki la dep ban shna bad plie ïa katei ka Commuity Hall.
Haba kren sha ki lad pathai khubor ha Shillong Press Club ha ka 02 tarik u Nailur 2025 u Bah Disparsing Rani u la pynpaw ka jinglyngngoh ba ha ka RTI ba u la ïoh ka pisa ba la mang ïa katei ka Community hall ka long T.29 lak bad ha u mawnongrim pat ki thoh T.45 lak, kane ka la pynkulmar ïa ki nongshong shnong.
U la ïathuh ruh ba ha ka jingkren jong u Symbud Myntri Rangbah ka Jylla, u Bah Prestone Tynsong ha ki lad pathai khubor u la shu jler, ba ka Sorkar ka la dep ban mang kumba T.35 lak ban shna ïa katei ka Community Hall, Nongshken bad ha ka RTI la lap T.29 lak, ha u maw nongrim pat ka mih T.45 lak.
Kumta u la ong ba shen un sa leit pan da ka RTI halor ka mang pisa kaba la mang ban shna ïa ka Nongsken Community Hall ha ka shnong Nongsken namar ka jingmih lai tylli ki mang tyngka ha kane ka project.
U la ïathuh ba ka Nongshken Community Hall kaba la plie ha ka 24 Naitung 2025, kaba la pynshna da ka Dorbar Shnong Nongshken hapoh ka jingpeit u Rangbah Shnong u Bah Thombor Marbaniang bad kaba la pynwandur da u Bah Ransom Sutnga.
“Hynrei namar ka jingslem palat ban shna ïa kane ka Community Hall nga la ujor noh da ka RTI, bad ha ka jubab ba nga ïoh na u BDO ka long ba ka mang tyngka kam dei T.35 lak kumba kdew da u Bah Prestone Tynsong bad ha ka 25 u Naitung 2025, ki la pyndep bad plie ïa kane ka Community Hall hynrei kaba kyndit pat ka long ba ha u mawnongrim ki thoh ba ka mang tyngka kaba ki la pynlut ban pyndep ïa kane ka hall ka long T.45 lak,” la ong u Bah Disparsing.
U Bah Disparsing u la ong ruh ba katkum ka jingkren u Bah Prestone ka long ba la mang T.35 lak, katba ha ka RTI la kdew ba ka mang tyngka ka dei T.29 lak bad ha u mawnongrim pat ki thoh T.45 lak. Kane ka la pynkulmar ïa ki nongshong shnong.
“Halor kane ka jingjler u Bah Prestone nga la ujor biang da ka RTI ban tip ïa ka jingshisha namar ha ka RTI nga ïohi ka pisa ba la mang kumba T.29 lak bad u Bah Prestone lehse u lah ban kren bakla da kaba kam ba la mang T.35 lak hynrei ka mih naei pat ka T.45 lak ha u mawnongrim, nga kwah ban tip,” la ong u Bah Disparsing.
U Bah Disparsing u la ïathuh ruh ba kawei ka jingujor RTI ka long halor ka Kynshi Stadium kaba ka Sorkar ka thmu ban shna ha kane ka shnong, watla ka la don ka jingai bor na u Lat ban shna noh ïa kane ka stadium hynrei kane ruh ka la shu jah la ka jah.
“Kumta nga ai por shibnai ïa kiba dei peit ïa kane ba ki dei ban ai jubab ïa ka RTI halor kane, da kaba kdew ruh ïa ka hukum (order) ka dei naduh u snem 2024, ha kaba ka jingmang pisa ka dei T.21 klur tam, ban shna ïa kane ka stadium,” u la ong.
“Kane ka long ka jingthok jingshukor ban pynbang ilekshon bad ki nongshong shnong ki dap da ka jingbitar halor kane”, u la bynrap.
