Shillong, Nailur 02
Namar ka jingjyllei ki kam tuh kam thiem bad ki kam sniew kiba har rukom bad ban tehlakam ïa kum kine ki jingjia, ka Dorbar Shnong Mawkhar ha ka 2 tarik Nailur, 2025 kala pyndait biang sa 5 tylli ki kor ringdur ne ki CCTV Camera ha ki bynta bapher-bapher jong ka shnong nalor kiba la don lypa.
Kane ka jingshim sienjam jong ka Dorbar Shnong ban dang pyndait shuh shuh ïa ki kor ringdur hapoh ka shnong ka thaw ka long ban tehlakam ïa kino-kino ki kam sniew hapoh ka shnong bad ban pynsuk ïa ka shnong ban lapdien lada don kino-kino ki kam tuh kam thiem lane lada don kino-kino ki jingdih drok ne jingkhaïi drok hapoh ka Shnong.
Nalorkata, ka jingpyndait ïa kine ki kor ringdur ka long ban peit bad khmih ïa ka jingpynïeng kali khlemakor jong ki briew hapoh ka shnong kaba wanrah pat ïa ka jingdheng kali ha kitei ki bynta.
Shuh-shuh, ka Dorbar Shnong Mawkhar kala buh ruh ka jingmaham ba lada ka lap ïa kino-kino ki briew kiba pynkheiñ ïa ki kyndon aiñ jong ka Shnong, ka Shnong kan sa leh da kaba tyngeh ïa ki.
Ha kane ka jingleit jurip nalor u Rangbah Shnong ka Dorbar Shnong Mawkhar, u Bah Ransom Sutnga bad ki nongkitkam ka Shnong, la ïadonlang da ki briew napoh ka ophis jong ka Shillong Municipal Board (SMB) bad kiba la noh synñiang ruh ïa kine ki kor ringdur.
Na ka liang u Bah Ransom Sutnga u la pynpaw ka jingsngewnguh ïa ka Shillong Municipal Board kaba la noh synñiang haduh 5 tylli ki kor ringdur sha ka shnong lyngba ka projek Shillong Smart City.
U Bah Ransom u la ong ba ka Shnong Mawkhar haduh mynta ka don kumba 20 tylli ki kor ringdur kiba la don lypa bad da ka jingïoh na ka Board kin sa long kumba 25 tylli.
“Kaba donkam eh ha kine ki sngi ba ngin ïaleh pyrshah ka long ha ka jingwan tyllep jong u drok ha ki shnong ki thaw jong ngi bad kumta ka long kaba donkam ban pynkhlaiñ ïa ka rukom treikam jong ngi. Na ka liang ka Dorbar Shnong jong ngi, ngi kwah ban pynkhlaiñ ïa kane ka rukom treikam jong ngi”, ong u Bah Ransom.
Da kaba kyrmen skhem ruh ba lyngba ka jingnoh synñiang da ka Board ïa ki kor ringdur, kane kan dang pynkhlaiñ shuh-shuh ïa ka jingshngaiñ hapoh ka shnong.
