Shillong, Nailur 02
Ka Mawtneng U.P&SS kaba na Ri-Bhoi District kam shym la ïoh ban shim bynta ha ka 64th International Subroto Mukher-jee Football Cup 2025 hadien ba ki bor pynïaid ki la pynsangeh ïa kane ka jingïalehkai kaba nyngkong kaba la thmu ban long ha ka sngi Ba-ar.
Ha ka jingshisha kat kum ka prokram ba la pyllait ha ka lah sngi U Blei, la ong ba katei ka kynhun ïalehkai Under-15 kaba la mihkhmat ïa ka Jylla ka la don ha ka Pool-B bad kan sdang ïa ka jingïakhun kaba nyngkong pyrshah ïa ka kynhun kaba na Gujarat ha ka sngi Ba-ar ha Bengaluru.
Na ka liang ki bor pynïaid ki la ai jingtip sha ki coach bad manager ba ïa kane ka jingïalehkai mynta ka sngi Ba-ar la pynsangeh, hynrei kim shym la pynpaw eiei halor kaei daw.
Kumba ka paw kane ka kynhun hapoh ka jingïalam u Bah Ïohborlang Jalong ka la long ba la pynkhreh na ka bynta katei ka lympung bad ka la ïoh ban kilanmet bha hashwa ba kan mih na ka nongbah ban leit sha Bengaluru.
Lah ban kdew ki la don 34 tylli ki kynhun ki ban ïashim bynta ha kane ka lympung ha kaba la phiah ha ki phra tylli ki Pool. Te kumta ki kynhun ki ban wan ha ki kyrdan ba hakhlieh na kitei ki Pool kin ïoh rung sha ka quarter final kaba la buh ban long ha ka 8 tarik, katba ka semi final ha ka 9 tarik bad ka final kan long ha ka 11 tarik mynta u bnai.
