Shillong, Nailur 02
Ka Madanheh East A ka la ïoh ban rah ïa ka trophy nam lahduh jong ka (L) Enshon Lamare Phudmuri Interdong Football Tournament 2025 ba la pynïaid da ka Seng Samla Mawlai Phudmuri (SSMP), hadien ba ka la pynliem noh ïa ka Madanheh East B da 1-0 kol ha ka jingïakhun final kaba la long ha ka sngi Saitjaiñ ha Madanheh Mini Stadium kaba ha Mawlai Phudmuri.
Kane ka shi kol ka la wan urlong lyngba u Banlam Lyngdoh Maw-phlang na ka bynta ban pynlong ïa ka Madanheh East A ban khur ïa katei ka nam.
Ka SSMP ka la pynlong ïa katei ka lympung kum shi bynta na ka jingrakhe ïa ka Ruby Jubilee ne jingdap sawphew snem jong ka. Ïa kaba ki la ai ai nam ïa kane ka lympung ha ka kyrteng jong u Rangbah Shnong barim i (L) Bah Enshon Lamare.
Ha katei ka sngi la ïa don lang ruh ka Kong Wonmai Warjri ka Kurim jong i (L) Bah Enshon Lamare kaba la long ka kongsan ha ka jingdon ryngkat lang ki bahaïing hasem, ki kur ki kha, ki nongïalam shnong, ki Seng Longkmie bad ki para nongshongshnong.
La ïoh ka jingkren shaphang ka jingim jong i (L) Enshon Lamare na u Dr. Sylvanus Lamare uba long u Pyrsa kur jong i bad kumjuh ruh na ka liang ka ïing ba la kren da u Bah Kitbok Lyngdoh Marshillong uba dei u pyrsa kurim jong katei ka longïing.
Ha kane ka sngi la sam ïa ki khusnam sha ki nongjop da ka kongsan bad la ai ruh ïa ki khusnam Best Player ba la ïoh rah da u Jasson Mawñiuh na ka Dong Madanheh East B, ïa ka khusnam Best Goalkeeper da u Harvey Massar na ka Dong Massar, ïa ka khusnam Top scorer la ïoh rah da u Kenny Kharbhih na ka Dong Madanheh East A bad ïa ka khusnam Discipline team la ïoh rah da ka kynhun ïalehkai na ka Dong Kjatshnong.
Ka Seng Samla Phudmuri ka la pynpaw ka jingsngewnguh kaba khraw ïa ka ïing ka sem jong ka Kong Wonmai Warjri kiba la nohsynñiang da ki trophy bad ki momentos na ka bynta kane ka lympung.
La pynpaw ruh da u President ka Seng Samla Mawlai Phudmuri ba ki dang bun kiwei pat ki jingïalehkai ha ki sngi ki ban wan haduh ban da poi ka sngi pynhap pyrda ïa ka jingrakhe Ruby Jubilee ha u Kyllalyngkot jong u snem 2026.
