Mairang, Nailur 02
Ha ka sngi Ba-ar jong ka taïew ka Sorkar Jylla lyngba ka tnat Social Welfare hapoh ka thong ‘Beti Bachao Beti Padhao’ (BBBP) ryngkat ka jingïatreilang bad ka District Sankalp Hub For Empowerment of Women, kala pynlong ïa ka prokram ai jingpynshai halor ka jinghikai ban sumar ïalade ha ka por ‘menstruation’ bad ha kajuh ka por la sam ruh ïa ki Sanitary Pad Vending Machines.
Ïa kane ka jingïalang la pynlong hapoh Multipurpose Hall jong ka DC Office, Mairang.
Shuh shuh ha katei ka sngi, ka Deputy Commissioner jong ka Eastern West Khasi Hills ka Kong Anita Kharpor kala long kum ka kongsan, ha ka jingdonlang ka District Social Welfare Officer ka Kong D Pakyntein, ka BDO jong ka Mairang Block ka Dr. L.R. Hynniewta, u DSP jong ka District u Bah P.S. Marwein, ki nonghikai bad ki khynnah skul na ki skul bapher bapher.
Ha kane ka sngi, shibynta jong kane ka thong, la sam ruh ïa ki Sanitary Pad Vending Machines kiba la ai khlem da shim pisa sha ki 30 tylli ki skul, kaba long ka sienjam kaba kongsan ban ïarap ïa ki khynnah kynthei ha ki skul.
Ka Deputy Commissioner ka Eastern West Khasi Hills ka Kong Anita Kharpor haba kren kum ka kongsan kala ai khublei kyrpang ïa ka District Social Welfare Officer bad ïa ka tnat Social Welfare halor kane ka sienjam ban sam ïa ki sanitary pad vending machines ki ban sa long ka jingmyntoi ïa ki khynnah kynthei, khamtam ha ki skul.
Shuh shuh ka Kong Anita ka la pynpaw ruh ïa ka jingdonkam ban pynneh ïa ka jingkhuid bad jingsumar hok ïa ki khynnah kynthei ha ka por ‘menstruation’.
Ka la kyntu ruh ïaki khynnah skul kiba long ka lawei jong ka district, ka jylla bad ka ri ba ki dei ban ieit ïalade da kaba ki sumar khuid ïala ka met, bad ban don ruh ïa ka jingkitkhlieh na ka bynta ka lawei jong ki, ym ban shu shah pynthame ki jingmut jingpyrkhat hano hano.
