Shillong, Nailur 02
Ka lahduh jong ka aïom ba la lah, ka Shillong Lajong FC ka la lah ban pynliem noh ïa ka Laitkor SC da 2-0 kol ha ka Shillong Premier League kaba la long ha ka sngi Ba-ar ha SSA Stadium, First Ground, Polo.
Ïa kine ki artylli ki kol la thep da u Deibormame Tongper (27′) bad u Emanbha Marbaniang (74′), katba na ka liang ka Laitkor SC ka la hap ban ïalehkai satang 10 ngut ki rangïalehkai hadien ba ka la shah beh noh uwei u rangïalehai na madan.
Ha kane ka janmiet jong kane ka jingïakhun u Deibormame u la ïoh ban ïalehkai nyngkong eh ha kane ka samoi kaba mynta bad ba u la ïoh ban thep ïa kane ka kol da kaba pyndei da ka khlieh lyngba ka free-kick.
Hadien kane, ka Laitkor ruh kam shym la ran dien, hynrei ka la pyrshang lem ban ïoh pynkhih lem ïa ka jar, ha kaba ka kabu ksiar kaba la wan paw shynna ka dei lyngba u Freelyson Tariang, uba la ïoh haduh artylli ki kabu ksiar kawei ka wan hadien ba ka bol ba u la ïoh ba pyndei da ka khlieh ka la kiew shalor ka dieng kol, kaba ar pat ka dei kaba u la ïoh ban shut jam bha ïa ka bol kaba la lait hi phar shabar jong ka kol.
Haba wan ban bteng ïa ka kylla miet u Richarles Rani u la hap ban mih noh shabar ka madan ha ka minit kaba 66 hadien ba u la ïohpdiang syndon da ka red-card na u rephri u Bah Jeffrey June Shabong halor ka ‘foul’ pyrshah ïa uwei na ki rangïalehkai ka Lajong, kaba pynlong ïa ka kynhun ba ha ki minit kiba sah ba kan hap ba kan ïakhun noh satang 10 ngut ha madan haduh ban da kut ka jingïakhun.
Wat la katta ruh, ki rangïalehkai ka Laitkor SC ki ïai pyrshang beit ban lah ha ka ban ïoh pynphai ïa kine ki kol katno tam lei-lei haba la ïarap ban kyrshan lem ïa ki da ki paid nongkyrshan kiba la mih paidbah ban ai mynsiem ïa la ki jong ki rangïalehkai.
Da kane ka jingjop, ka Lajong mynta ka la ïoh ban khur 7 poiñ bad ban bat ïa ka kyrdan ba-ar kata hadien ïa ka Nangkiew Irat kaba la ïoh 9 poiñ, katba ka Laitkor SC ka la ïoh ba kan khur shwa tang 3 poiñ bad ba kan don ha ka kyrdan kaba hynriew.
Ha ka sngi Balang ka jingïalehkai kan dei ka artad ka jingïakhun ba khatduh jong ka kylla kaba lai (Rd-3) hapdeng ka Mylliem SC pyrshah ïa ka Malki SC ha ka por 4:30 nohphai sngi.
