Shillong, Nailur 02
Ka Sorkar Jylla kan bei T.6.6 klur ban kyrshan ïa 165 ngut ki samla ban ïaid shakhmat bad ka jingpule B.Sc ha ka laiñ ‘Hospitality and Hotel Management’ ha kine ki san snem ban wan.
Ïa kane la pyntip da u Myntri ka tnad kam jngohkai pyrthei, Bah Paul Lyngdoh ha ka jingplie paidbah ïa ka Chief Minister Hospitality Scholarship Programme (CMHSP) ha ka Sngi Ba-ar.
U Bah Lyngdoh u la ong ba ka jingthmu jong kane ka prokram ka long ban pynshlur ïa ki samla ban rung sha ki jingpule laiñ ba kham halor ha ka liang ka ‘Hospitality’, ban btin lynti bad ban pynheh-pynsan ïa ki samla na ka bynta ki lad ki kabu ha ka pyrthei bad ban pynkhlaiñ ïa ki nongtrei ba tbit jong ka Jylla haba ïadei bad ka liang ka ‘Hospitality’.
“Kan don ka jingkyrshan ‘Tuition Fee’ kaba 100% na ka bynta ki samla kiba pule ïa ka B.Sc ha ka laiñ ‘Hospitality and Hotel Management’ ha IHM Shillong,” u la ong ba 165 ngut ki samla pule kin ïoh ka jingkyrshan ha kine ki san snem ban wan, ha kaba 55 ngut ki samla pule (iwei na kawei ka Block) kin ïoh pdiang ïa ka baibam ha ki lai tylli ki bynta.
U la ong ruh ba ki samla ki dei ban long ki nongshong shnong ba pura jong ka Jylla Meghalaya, kiba la pyndep ïa ka klas XII ryngkat ka ‘English’ kum ka sobjek bad ha kaba ka jingïoh jong ka longïing jong ki ha ka shisnem ka long hapoh T.3 lak. Kan ym don kano-kano ka jingpyrkhing ha ka liang ka rta.
Ka jingjied ïa ki samla pule kan long katkum ka ‘Merit’/’Interest’ bad ka jingjied kaba khatduh yn sa leh da ka State Level Selection Committee.
“Ïa ka ‘Tuition Fee’, yn sa khmih da ka Sorkar Meghalaya ha kaba ka jingbei tyngka baroh na ka bynta ban kyrshan ïa ki 165 ngut ki samla pule haduh palat san snem ka long T.6.6 klur. Kane ka mut ba ngi bei tyngka haduh T.3.6 lak na ka bynta iwei-iwei i samla pule,” la pyntip u Bah Lyngdoh.
Katkum ka jingong jong u, ki samla pule kin hap ban siew na bynta ki ‘Hostel’, ka bam, ki ‘uniform’ bad kiwei-kiwei ki jinglut jingsep barit-baria.
