Nongpoh, Nailur 02
Kumba 53 ngut ki shipai Royal Thai Army jong ka ri Thailand ki la wan poi ha ka ktem shipai jong ka ri India ha ka Joint Training Node, Umroi, Ri Bhoi District ban ïashim bynta ha ka jingïakilan met kaba khadsaw (14) sngi lynter bad ki shipai ka ri India ïa kaba la ai kyrteng kum ka MAITREE-XIV.
Kane ka jingïakilan met kaba la sdang naduh hynnin ka sngi, kata ka 1 tarik u Nailur 2025, yn pynkut ha ka 14 tarik u Nailur 2025 ha kaba na ka liang jong kitei ki shipai ka Royal Thai Army, la wan ban mihkhmat da ki 53 ngut ki shipai na ka 1st Infantry Battalion, 14th Brigade katba na ka liang jong ka India, la mihkhmat da ki 120 ngut ki shipai ka Madras Regiment.
Kane ka jingïakilan met ka dei shibynta ka jingpynkhlaiñ ïa ka jingïadei, ka jingïatreilang bad ka jingai jingmut markylliang hapdeng ka ri India bad Thailand na ka bynta ban ïakhun ïa ki lehnoh ha ki jaka kiba long khap-sor katkum ka Chapter VII jong ka United Nations Charter.
Ha kine ki khadsaw sngi lynter, ki shipai na kine ki ar tylli ki ri kin pynlong ïa ka jingïakilan met ha ki bynta kiba bun rukom, kiba kynthup ïa ka tactical drills, joint planning, special arms skills, physical fitness and raiding operations.
Kum ban shu kdew, ka jingïakilan met MAITREE kaba la sdang nyngkong ha u snem 2006 ka dei kawei na ki jingïakilan met kaba kongsan hapdeng ka ri India bad Thailand kum shi bynta ban pynkhlain ïa ka jingïadei hapdeng ki shipai jong kine ki ar tylli ki ri ban wanrah ïa ka jingsuk bad jingshong shngaiñ ha ka thaiñ.
