Shillong, Nailur 02
Ka Meghalaya Arm Wrest -ling Association (MAWA) kan pynlong ïa ka rynsan ïakhun kti ba la tip kum ka Meghalaya State Arm Wrestling Championship 2025 ka ban sdang naduh 27 tarik mynta u bnai Nailur haduh 4 tarik u Risaw 2025 ha Shillong College.
Kane ka lympung ka long shi bynta ban pynkhreh na ka bynta ban jied ïa ki nongïakhun kti kiba kynsai ki ban mihkhmat ïa ka Jylla sha ka 39th National Games ka ban long ha u 2027 ha Meghalaya.
Ha kane ka lympung ka ban neh haduh shitaïew lynter kan kynthup ïa ki jingïakop naduh ki skul, kolej, ophis sorkar ne riew shimet bad kumjuh na ka bynta ki gym kiba don ha kylleng ki district jong ka Jylla.
Haba ïakren sha ki lad pathai khubor ha ka sngi Ba-ar ha Shillong Press Club, u President ka MAWA u Bah Junestar Kharbuli u la ong ba kane ka dei ka kabu ksiar ïa ki paidbah nongshong shnong ka jylla ban wan ïashim bynta ha kane ka jingïakhun kti naduh ki skul, kolej bad ki ophis sorkar ba pher bapher, ki gym bad kiwei kiwei de.
“Ynda la dep pynlong ïa katei ka lympung, ha u Risaw ne Naiwieng kan sa don ka jingjied ïa ki nongïalehkai ki ban ïoh ka jingshah hikai ha ki coach,” u la bynrap.
Shuh shuh u Bah Kharbuli u la ïathuh ba ha katei ka prokram ai jinghikai yn sa wan ai jinghikai da ki coach napoh ka Jylla. “Ngin sa wanrah ruh ïa ki coach nabar ri ruh na ka bynta ka jingpynkhreh ïa ka National Games ka ban long ha u 2027.”
“Te kumta ngi kyntu bad wer ïa ki samla ka jylla Meghalaya ba kin wan sha katei ka jingïakhun kti ka ban sdang naduh ka 27 tarik haduh 4 tarik u Risaw 2025 ka ban long ha Shillong College,” u la bynrap.
