Shillong, Nailur 03
U Tatu R Marak u la phah da ka shithi sha u In-charge Officer ka District Social Welfare Office (DSWO), Resu-belpara, North Garo Hills halor ka jingkyrpad ban ïarap ïa u nonghikai skul uba duna dkhot met na Khaldang Ad-hoc Upper Primary School Resubelpara North Garo Hills Meghalaya, ban pynïoh ïa ka hok bad ka jingkyrshan pisa na ki nongleh bymman.
Ha ka shithi, u Tatu R. Marak uba dei u khun jong u Kiljon K. Sangma na Khaldang Songma Resubelpara ha North Garo Hills, u la ong ba ka jingphah jong u da ka shithi ka long ban pyntip halor ka jingdon ka jingshah lehbeiñ jong uwei u nonghikai ba duna dkhot met, u Kiljon K. Sangma uba la shah pynsangeh kam hikai da ka bor ha u Headmaster bad SDSEO, W.G. Momin Resubelpara North Garo Hills khlem kano kano ka jingïakren bad ka Managing Committee.
“U kpa jong nga, u Kiljon K. Sangma u la long u nonghikai ba aiti bad trei shitom ha Khaldang Upper Primary la bun bun snem. Watla u mad ïa ki jingeh ha ka met namar ka jingduna ha ki dkhot met, hynrei u la long borabor ka jingkyrkhu ïa ka skul bad ka jingai mynsiem ïa ki khynnah skul bad ki nongtrei bad kumjuh ruh ïa ki nongshong shnong jong ka Khaldang Songma”, ong u Tatu Marak.
U la ong ba dang shen kata ha ka 24 tarik Rymphang, 2025, u nongpynïaid jong ka skul Upper Primary ha Khaldang bad u ophisar ka SDSEO u la thmu ban pynkut kam kynsan ïa u Kiljon K. Sangma da kaba ong ba ka jingsiew jong ki nonghikai ad-hoc ha Khaldang Upper School ka la sahkut namar ka jingtrei ki nonghikai ba la 60 snem kaba la thmu ban pynsangeh da u ophisar ka SDSEO.
“Kane ka jingleh shiliang khmat ka la wanrah ïa ka jingeh ha ka liang ka pisa tyngka ïa ka ïing ka sem jong nga namar ba u kpa jong nga u dei tang ma u, uba pyndap ïa ka ïing ka sem bad mynta khlem kano kano ka jingkyrshan pisa um lah ban ïoh jingsumar”, ong u Tatu Marak. U la ong ba kum u nongpang ba sumar, u la mad shibun ki jingshah lehbeiñ kiba khlem akor da u nongpynïaid skul bad u ophisar SDSEO, kaba la ktah jur ïa ka jinglong jingman jong u kpa jong u bad pynjah burom ïa u hakhmat ki paidbah da kaba pyndonkam bakla ïa ka bor.
“Namarkata nga ngeit skhem ba kane ka jingleh bym hok ka ïaid pyrshah ïa ki nongrim jong ka jingïaryngkat bad ka hok longbriew manbriew”, u la ong. Da kaba buh ïa ka jingkyrpad ïa ka District Social Welfare Office (DSWO) Resubelpara ba kan tohkit bniah ïa kane ka kam bad leh ïa kaba donkam ban pynthikna ba u kpa jong u un ïoh ïa ka hok bad dei ban pynbiang ïa ka jingkyrshan bad ki jaka sah kiba donkam ban ïoh ïa ka jingsiew bai lutksan.
“Nga ngeit ba ka District Social Welfare Office (DSWO) Resubelpara North Garo Hills kan shimkhia kyrkieh ban weng ïa kane ka jingeh bad ban pynneh pynsah ïa ka hok jong ki riew shimet kiba don jingduna ha ki dkhot met ha ki jaka treikam”, bynrap u Tatu Marak.
