Shillong, Nailur 03
U rangïalehkai ‘dien ka kynhun ïalehkai ka India u Sandesh Jhingan un duh shim bynta ha ki jingïa-khun ba dangsah jong ka CAFA Nations Cup na ka daw ka jingmynsaw, la pynbna ka All India Football Federation (AIFF) ha ka sngi Balang.
Kat kum ka kywoh ba la pyllait ha rynsan social media, la ong ba utei u rangïalehkai ba la 32 snem ka rta u la mynsaw ha ka jingïalehkai kaba ar ha kaba ka India ka la shah rem da 0-3 kol ha ka Iran ha Hisor Central Stadium kaba ha Tajikistan.
“Un leit phai noh sha India mynta ka sngi,” la ong ka kyrwoh.
Kumba ka paw kane ka lympung ka dei ka sien kaba nyngkong eh na ka bynta u coach ba thymmai ka India u Khalid Jamil, bad u Jhingan u long uba kongsan na ka bynta ban pynjop ha ka jingïakhun ba nyngkong pyrshah ïa ka Tajikistan.
Wat hapdeng kane ka jingshah rem ha ka Iran, ka India ka dang ïai bat ïa ka kyrdan ba-ar bad ka dang don ha ka jingïakhun ban ïoh ïa ka jaka ha ka kyrdan balai lada ka dang lah ban wanphai sha ka jingjop. Te kumta kane ka kynhun kan pynkhreh ban ïakhun pyrshah ïa ka Afghanistan ha ka sngi Palei bad kaba long ka jingïalehkai kaba khatduh.
Kane ka lympung kaba kynthup ïa kiba bun ki ri jong ka Central Asia, ka long kaba kongsan na ka bynta ka India namar ba ka dang pynkhreh ïa ka jingïalehkai jong ka Asian Cup qualifying round pyrshah ïa ka Singapore ka ban long ha ka 9 bad 14 tarik u Risaw mynta u snem.
