Jowai, Nailur 03
Ka jingkieng ba kongsan ha ka surok Amlarem, Kudengrim ha Amsohkhri, Khonglah ka la dkut bad hap jraiñ ha ka 3 tarik Nailur ha ka por shiteng sngi hadien ba kawei trok kit khyndew ka la ngam noh sha ka wahduid kaba don shapoh jong kane ka jingkieng.
Watla katta, ha kane ka jingjia ym shym la don kino kino ki ban ngat ha ka jingmynsaw.
Ka jingtwa jong kane ka jingkieng ka la khanglad ïa ka jingpynïasoh sha kiba bun ki shnong jong ka thaiñ kynthup sha ka shnong Padu, Khonglah, Nongbareh bad Kudengrim.
Ki nongshong shnong ki la ong ba kane ka jingjia ka la wan long ruh hadien ba ki kali kiba kit khia ki la bteng ban ïaid lyngba kane ka jingkieng kaba la sator wat hadien ba la khang pyrshah bad kaba la buh ka jingbym shngaiñ ïa ka leit ka wan.
Ka Sub-Divisional Officer (Civil), Amlarem, naduh kham hashwa kala pynmih ïa ka jingpynbna kaba khang pyrshah ïa ki kali kiba kit khia ba kin ïaid lyngba kane ka jingkieng namar ka jingshna ïa ki jingkieng RCC bathymmai hapoh jong ka PMGSY-III.
Katkum kane ka jingpynbna naduh 8 tarik Naitung 2025, ka la khang pyrshah ïa ki kali kiba kit khia ba kin ïaid na kane ka jaka naduh ka 9 tarik Naitung tad haduh ban da pyndep ïa ki jingtei bathymmai.
Hynrei, ki nongshong shnong ki la kynnoh ba ki trok ki la bteng ban pynkheiñ ïa kane ka hukum bad kaba la lam sha ka jingkhyllem bad hap jraiñ jong kane ka jingkieng.
