Shillong, Nailur 03
Ka kynhun ïalehkai Under-15 boys jong ka Mawtneng U.P&SS ka la duh shi syndon ban shim bynta ha ka 64th International Subroto Mukherjee Football Cup 2025 hadien ba ki bor pynïaid jong katei ka lympung ki la lap ba ki la don haduh saw ngut ki khynnah kiba la palat ïa ka rta ba la buh.
Kat kum ki khubor ba la ïoh lum jingtip la ong ba kane ka lympung mynta u snem ka la long kaba kham pyrkhing bha ïa ki rta jong ki khynnah khnang ba kin ym don napdeng jong ki kiba la ïaw rta, hynrei wat hapdeng kane ka jingpyrkhing ki dangdon ki kynhun kiba la pynrung lang da ki khynnah kiba la heh rta bad kane ka la wanrah ka jingeh kaba khraw ïa ki bor pynïaid.
Kumba ka long mynta kane ka long ka jingsah kynmaw shirta ïa ka Jylla hi baroh kawei namar ka tnat ïalehkai jong ka Sorkar Jylla kam shym la lah ban bishar bniah ïa ki rta jong ki khynnah bad dei na kane ka daw ba ka skul Mawtneng kaba na Ri-Bhoi District ka la hap ban duh ïashim bynta shi syndon ha katei ka lympung kaba la pynlong ha Bengaluru.
Ha ka jingshisha ka Mawtneng kaba la mihkhmat ïa ka Jylla ha ka Under-15 Boys hadien ba ka khur ïa ka nam lahduh ha ka State Level Subroto Cup, ka la dei ban ïashim bynta ha ka sngi Ba-ar pyrshah ïa ka kynhun kaba na Gujarat, hynrei kane ka kynhun ka la hap ban wanphai noh sha la ïing ryngkat ka jingdiaw mynsiem.
La ïathuh ba ki don haduh 21 tylli ki kynhun na kylleng jong ka ri India kiba la shah weng shi syndon na kane ka lympung tang namar ka jingbym lah ban shim khia da ki bor Sorkar ha ka ban bishar bniah ïa ki rta jong ki khynnah.
