Shillong, Nailur 03
U MLA ka North Shillong Constituency, u Bah Adelbert Nongrum ha ka janmiet jong ka 3 tarik Nailur, 2025, u la leit sha thanat Lumdiengjri ban ïakynduh ïa ka Officer In-charge (OC) ka Kong Tariang ban ai khublei ha ryngkat ka jingai buskit ïa ki Pulit kiba la trei shitom ban tohkit bad ban pynpaw pyrthei ïa ki jingshisha tang hadien kumba katto katne sngi ka jingjia ha kaba kawei ka khynnah kaba la kynnoh ba ka la shah dung da u thyrnia injek ha ki runar hajan ka Madan Student ha Jaïaw ha ka 18 tarik Nailar, 2025, katba ka dang ïaid lynti marwei.
Haba kren sha ki lad pathai khubor, u Bah Adelbert Nongrum, u la ong ba kumba u la kular ha ka por ba u leit ban peit ïa katei ka khynnah sha Dr. H. Gordon Roberts Hospital, ha ka 19 tarik Nailar, 2025, u la kular ban ai buskit T.10 hajar sha kiba ai ïa ka jingtip kaba thikna ïa kita ki briew kiba donkti ban dung thyrnia bad T.20 hajar sha kiba ïoh ban kem ïa kiba donkti ban leh ïa kane ka kam.
U Bah Adelbert ula pynpaw ka jingsngewnguh bad ka jingai khublei khamtam ïa ka tnat Pulit kaba la trei shitom ban pynpaw ïa ka jingshisha halor kane ka jingjia tang hadien khyndiat por.
Kumta, hadien ba ki bor Pulit ki la tohkit bad ïoh jingtip kaba thikna ba ym don mano mano ba donkti ban leh ïa kane ka kam kumba la pynpaw da u Superintendent of Police (SP) ka East Khasi Hills, u Bah Vivek Syiem, na ka liang u MLA u la leit ban ai da ka buskit kaba T.10 hajar ha ka OC jong katei ka thanat kum ka dak ban ai mynsiem sha ka tnat Pulit bad ban nang ïai trei shitom ryngkat bad u.
“Dei halor kata ka nongrim, nga wan ha kane ka por ban pyndep ïa kaei kaba nga la kular bad ban ai mynsiem na ka bynta ka tnat Pulit da kaba ai ïa ka buskit kaba T.10 hajar ha ka kti jong ka OC, kum ka dak ka jingai mynsiem ba ka tnat Pulit kan dang lah ban trei shitom”, ong u Bah Adelbert.
Shuh-shuh, u Bah Adelbert u la pynpaw ba hadien ka jinglap ïa ka jingshisha da ki bor Pulit, ka la wanrah biang ïa ka jingsngew shngaiñ bad ka jingsngewskhem da ki paidbah ha ka tnat Pulit.
U la pynpaw ruh ba kano kano ka kam thok bad ka kam buhrieh kam lah ban neh slem hynrei kan paw beit ha kawei ka sngi.
