Shillong, Nailur 03
Ka jingmih ka khubor ha kine ki sngi ba kawei ka khynnah skul ka la shah dung thyrnia ha ki briew ki bym shym la ithuh ka la pynlong ïa ki kmie ki kpa ban sngewsyier ban phah ïaid marwei ban leit bad wanphai na skul sha ïing kat haduh ba ki hap ban pynlut ïa ka por ba ki hap ban leit buh bad leit shaw hi.
Kum ban shu pynkynmaw ha ka 18 tarik Nailar, 2025 ka thanad Lumdiengjri ka la ïoh ïa ka ejahar halor ka jingshah dung thyrnia injek kawei ka khynnah skul ha ki briew ki bym shym la ithuh satia kaba la jia hakhmat ka ophis ka Bible Society of India kaba don ha Jaiaw Pdeng.
Kane ka jingmih ka khubor ka la pynsyier ïa ki kmie ki kpa kiba sah ha Jaiaw, Lumdiengjri bad ki shnong ba marjan kiba ïaid lynti nakhmat ka ophis BSI Jaiaw kaba don hajan Synod College, ban phah skul sha kiba bun ki skul kiba don ha kane ka thaiñ kum ka KJP Girls Higher Secondary School, Jaiaw Presbyterian HSS, Synod HSS, Mawkhar Christian HSS, St Dominic HSS, DNS school.
Kane ka jingsyier mynsiem ki kmie ki kpa ka la sdang ban ai mynsiem biang hadien ka jingpynshai na u Superintendent of Police ka East Khasi Hills District Bah Vivek Syiem uba la phah ïa ka kyrwoh khubor ha ka 2 tarik mynta u bnai Nailur 2025 ba kam don kum kata ka jingshah dung thyrnia injek hadien ba ki pulit ki la pynlong ïa ka jingtohkit.
Haba U Nongsaiñ Hima u la pyrshang ban ïakren bad ki katto katne ki nongshong die dukan ha Jaiaw Pdeng, kim shym la treh ban kren ha ‘camera’ hynrei ki la ïathuh ba naduh ba la mih kane ka khubor ba shah dung thyrnia injek ki kmie ki kpa kim shngaiñ shuh ban phah ïaid marwei ïa ki khun ban leit sha skul khamtam kito kiba ïaid nakhmat ka BSI ophis kaba la mih ka jingkynnoh ba shah dung thyrnia injek namar ki la sheptieng. Ki la ïathuh ba wat kiba shong dukan ki don lang ka jingsyier mynsiem lada khang miet ïa ki dukan namar kim sngew shngaiñ hynrei ki don jingkyrmen ba ka jingshngaiñ kan wanphai biang khnang ba ki khynnah skul kin shngaiñ haba ki leit bad ki wan sha ïing.
