Shillong, Nailur 03
Ka Mawpat SC ka la khur jingjop ha ka lympung ïalehkai 2nd Division Football League 2025 ba la pynïaid da ka Shillong Sports Associa-tion (SSA), hadien ba ka la lah ban pynliem noh ïa ka Jongksha SC da 3-0 kol ha ka sngi Balang.
Kane ka nam jop ka la wan urlong lyngba u Wanlambor Marynting, Thampson Lyngdoh bad u Kardilius Kharkongor na ka bynta ban pynlong ïa katei ka kynhun ban kamai ïa ki 9 poiñ na baroh lai sien ïakhun.
Ha kane ka jingïakhun kaba la long ha SSA Stadium kaba ha First Ground Polo, baroh ar ki kynhun ki la pyrshang ban ïakhun tyngeh naduh kaba sdang. Hadien shiteng kynta ka Mawpat ka la pynkhih jar nyngkong eh lyngba u Wanlambor ha ka minit kaba 36. Kane ka shi kol ka la ïaineh haduh kaba kut jong ka kylla step na ka daw ba ka liang pyrshah kam shym la lah ban pynphai.
Hadien katto katne por ba la bteng ïa ka kylla miet, ka Mawpat ka la pynbud ïa ka kol kaba ar lyngba u Thampson ha ka minit kaba 59. Hashwa ban wai kane ka kynhun ka la thep biang ïa ka kol kaba lai lyngba u Kardilius ha ka minit kaba 88 na ka bynta ban khur syndon ïa ka jingjop.
Lyngba kane ka jingjop ka Mawpat ka dangïoh ban lamkhmat ha ka Group-A, katba ka Jongksha (3 poiñ) ka dangsah ha ka kyrdan balai kata hadien ïa ka Mylliem Lum (6 poiñ), kaba don ha ka kyrdan ba-ar.
Ka jingïalehkai ha ka sngi Palei kan long hapdeng ka Nongmensong SC pyrshah ïa ka Umphyrnai SC ha ka por 11:15 mynstep bad ka Smit SC ïa ka Marbisu SC ha ka por 1:45 mynsngi.
