Jowai, Nailur 03
Ka Mookymphad Mihmyntdu, Umchangiar SC bad Riatsaliya Mihmytdu ki la khur jingjop ha ka 3rd Division, katba ka Chilliangraij SC bad Khliehmyntang Ïalong ki la ïakhaid ha ka 2nd Division Football Tournament.
Ïa kine ki lympung la pynïaid da ka West Jaiñtia District Sports Association (WJDSA) ha ka sngi Balang ha Kiang Nangbah Stadium, Jowai.
Ha ka jingïalehkai 3rd Division, ka Mookymphad Mihmyntdu ka la pynliem noh ïa ka Catholic Youth Mihmyntdu da 2-0 kol. Ïa kine la thep da u Jerry Dhar (26) bad Humbertson Rymbai (69).
Ha ka jingïalehkai kaba bud, ka Umchangiar SC ka la jop da 1-0 kol ïa ka Loompyrdi Ïongpiah SC bad ïa kane la thep da u Monlang Sutnga ha ka minit kaba 5.
Ha kawei pat ka jingïalehkai, ka Riatsaliya Mihmytdu ka la pynrem noh ïa ka Lumkhangdong Kyndongtuber da 1-0 kol bad kane ka la wan urlong lyngba u Jeremy Shylla ha ka minit kaba 15.
Haba phai sha ka jingïalehkai jong ka 2nd Division hapdeng ka Chilliangraij SC bad Khliehmyntang Ïalong ki la ïasam mar shi point hadien ba kim shym la lah ban thep kol haduh kaba kut ka jingïalehkai.
