Raphael Warjri
Kiba bun ki briew ha ka juk mynta ki la kham shim jingkitkhlieh tang ïa la ka met lajong bad ym da salia shuh ïa ki paradoh parasnam na la ka ïing lajong, ynnai ïakren lei lei ïa ka kur ka jait, ka shnong ka thaw. Kane ka jinglong ka dei kaba shong syier ïa ka longïing longsem, ïa ka kur ka jait, ïa ka shnong ka thaw, bad ïa ka imlang sahlang baroh kawei. Kumta ka dei ka kamram jong ki samla ban kyrsiew thiah ïa ka pateng longdien, namar ba ïa ki tymmen ki kro ym don shuh ki ban shahshkor, ïa ki rangbah rangsan ruh ym don shuh ki ban burom, ïa ki khyllung khynnah ruh la shu iuhroit naphang, dei tang para samla ba donkam ban pynsngewthuh ba ka sneng ka kraw ka long kaba donkam na ki tymmen ki kro, ka kyntu kynpham ka donkam na ki rangbah rangsan, ka syllok ka mir jingmut ka donkam para samla, ki khyllung khynnah dei ban ailad ba kin mad ïa ka pyrthei da kaba husiar ban ïalam sha ka lynti babha haduh ynda la ih ka pyrkhat bad ïaw ka ryta kum ki samla lud shwa ba kin khajoh sha ka jinglong samla pura. Kane ka jinglong jingman ha ka imlang sahlang ka la poi shaduh u pud ba mano mano ym lah shuh ban shañiah ïano ïano. Kane ka long kaba ma shikatdei ïa ka imlang sahlang kyllum bad kaba pyntroiñ ïa ki briew shimet ha lade. Ki kmie ki kpa ha ka jinglong tymmen kim shaniah shuh ïa la ki khun ki ksiew, ki khun ki kti kim shaniah shuh ïa la ki kmie ki kpa bad ki khyllung khynnah ha ka jinglong sngur ka mynsiem ki shah aibih ha janor na la ki kmie ki kpa lajong lane na la ki hynmen para lajong lane wat na kiba la san la rangbah ha ka longïing longsem, ha ka kur ka jait bad wat ha shnong ha thaw.
Ka jingshañiah ka long ka ba donkam bha ha manla iwei-pa-iwei na ki riew shimet ha lade bad ba dei ban kamai ïa kata ka jingshañiah da ka ba sdang shwa na lade. Lehse ka por ym pat da dier, hynrei ym dei ban sngew shngaiñ ïa ki jingkylla basniew kiba kloi lan ban pur ter-ly-ter. Ha kajuh ka por ka kam babha kum kaba kamai jingshaniah ym long kaba lah ban ïoh noh mar mar, hynrei dei ban kamai suki-pa-suki da la ki nuska babha na lade hi shwa ba yn khmih lynti ban ioh jingshañiah na kiwei. Kawei na ki daw bah kaba ktah ïa ka mynsiem ban shañiah markylliang ka kyrsoi hi na ka pisa tyngka. Ki don ki kmie ki kpa ka juk mynta kiba ym tip la ka kamram ban kamai jakpoh na ka bynta la ki khun ki kti ba la kha sha pyrthei, bad khongpong ki pyndonkam ïa la ki khun ynda ki la kham san ba kin kyrshan lem ha ka kam kamai kajih ban kham suk ïa lade bad syrtok pat ki khun ki kti. Kane ka rukom ka kylla ban pynlong ïa ki khun kiba trei minot bad duriap ba kin pyrkhat noh tang ïa lade shimet da kaba syntan ban ïarap ïa la ki kmie ki kpa kiba ym tipthuh ban ñiewkor ïa ka synñiang jong ki khun lajong.
Ha kawei pat ka liang ki don ki kmie ki kpa ki ba tur ïa ka maw ka dieng na ka bynta ban bsa ban btiah ïa la ki khun haduh ban kin da san da rangbah, hynrei ki khun pat kim ju salia shaphang kaba len lade ki kmie ki kpa bad tang la biang la ka met kim pyrwa wat ban ïehnoh ïa la ki kmie ki kpa bad ban ïaid tynneng ïa ka pyrthei ban pyrthuh ïa kiwei pat ki khun riewspah. Lada dei lei lei ki kmie ki kpa ki ba khlem ka jingnang jingstad, ki don ki khun jynreiñ ki ba lehraiñ wat ban kam kmie kam kpa ïa la ki kmie ki kpa lajong. Kata ka dei kaba la jia ha kiba bun ki longïing longsem ha ka juk mynta. Namar kata ym phylla ba ki kmie ki kpa kin ym shaniah shuh ïa la ki khun haba ki leh bym suitñiew ïa la ki kmie ki kpa lane kiba lah ruh ban ïuhroit ïa ka longrynñieng jong ki kmie ki kpa lajong. Kumta ha ka imlang sahlang ka la khleh bad kyllaiñ ka rukom ïadei jong ki kmie ki kpa bad la ki khun ha baroh ki liang. Ka ju don ruh ka khep ba u kpa u trei shitom ban kamai na ka bynta la ka longïing longsem, hynrei ka kmie ka sylla bad la ki khun ban pynjem rngiew ïa la u tnga uba dei u kpa ki khun, da kaba shim kabu ban khwan ïa ka kamai kajih khlem da ai kylliang ka burom ka akor kum u kpa shisha. Ha kawei pat ka liang ki don ruh ki kpa ki ba lyngkar ka jingim khamtam lei lei ha ba ki phyrngop ha ki kam awria bad byr-ngia ha ka khalai ne kano kano ka kamkai khlem da tip ban phikir ïa la ka tnga bad ki khun. Kum ha kane ka rukom ki longkmie kim banse ban duriap minot hi da lade ban bsa ban btiah ïa la ki khun bad teng teng hap ban pynbiang ïa u tnga ruh uba khlem ai eiei bad ka khwan sha lade khlem ka raiñ ka rem. Kum kita ki jinglong jingman ha kano kano ka longïing longsem ka dei ban adkar na ka liang jong kito ki ba mar-mlien ha ki kam kynsha kiba ym dei ban long, bad ïa kito ki ba shah ïuhroit ne banbeiñ ki lah ban ïaishah haduh u pud ba lah ban khmih lynti ki jingkylla na kito kiba leh ïa ki kam kynshia ha ka longiing longsem.
