Jowai, Nailur 03
Ka United FC Ummulong bad ka Wahïajer ki la khur jingjop, katba ka Madur bad Ryntih Mynsngat ki la ïakhaid ha ka lympung ïalehkai 2nd Division bad Super Division Football Tournament ba la pynïaid da ka Thadlaskeiñ Sports Association (TSA).
Ha ka jingïalehkai jong ka 2nd Division kaba la long ha Wahïajer Multi Sports Complex kaba la long ha ka 2 tarik, ka United FC Ummulong ka la jop da 1-0 kol ïa ka Mupliang RC bad kane ka la wan urlong lyngba ka shi kol ba la thep da u Iajanki Kynjing ha ka minit kaba 5.
Ha ka jingïalehkai kaba bud hapdeng ka Madur SC bad Ryntih Mynsngat ki la ïasam mar shi point hadien ba kim shym la lah ban thep kol.
Haba phai sha ka Super Division, ka Wahïajer ka la pynliem noh ïa ka Pohskur Phlong Iingkhaw da 2-0 kol. Ïa kine la thep da u Hame Dkhar ha ka minit kaba 11 bad u George Ryngkhlem (50).
Ka jingïalehkai jong ka 2nd Division ha ka sngi Palei kan long hapdeng ka Thadmusem bad Lad Mukhla ha ka por 10 baje mynstep bad ka Laru FC ïa ka Moodop Nartiang ha ka por 12 baje mynsngi. Katba ha ka Super Division ka Heiboriong-i FC kan ïakhun pyrshah ïa ka Mookyndur ha ka por 3 baje nohphai sngi.
